Агентлик ҳамда “Ўзкимёсаноат” акциядорлик жамияти ҳамкорлигида 2022 йилда амалга ошириладиган чора-тадбирлар режаси ишлаб чиқилиб, тасдиқланди.  

Унга кўра, “Ўзкимёсаноат” АЖ тизимида вужудга келиши мумкин бўлган коррупцион омилларни ўрганиш ва олдини олиш мақсадида тизим корхоналарида коррупция хавф-хатарлари юқори бўлган фаолият йўналишлари ва лавозимлар рўйхати шакллантирилади, шунингдек, мазкур хатарларни минималлаштиришга қаратилган чора-тадбирлар амалга оширилади. 

“Ўзкимёсаноат” АЖ тизимига номзодларни ишга қабул қилиш, лавозимга тайинлашда коррупцион хавф-хатарларни бартараф этиш мақсадида номзодларни ишга қабул қилиш жараёни очиқ танлов асосида онлайн трансляция қилиб борилади. 

Жамият тизимида ходимларнинг белгиланган қонунчилик талабларини қўллай олиши, уларнинг профессионаллиги ва тезкорлиги ҳамда коррупцияга қарши муросасиз муносабатни шаклланганлик даражасини баҳолаб бориш учун “Сирли мижоз” ёки “Сирли мурожаатчи” мониторинг тадбирлари ташкил этилади. 

Шунингдек, тизимдаги қонунбузилиши ҳолатлари ва коррупцион жиноятлар тўғрисида хабардор қилиш механизми (алоқа каналлари)ни янада такомиллаштириш чоралари кўрилади. 

“Максам-Чирчиқ” АЖ мисолида кимё саноатида содир этилаётган коррупцияга оид жиноятларни таҳлил қилиниб, уларнинг  келиб чиқиш сабабларини бартараф этиш бўйича иш олиб борилади.

Бундан ташқари, тизим ходимларининг касбий одоб-ахлоқ қоидаларига риоя этиши ҳамда уларда коррупцияга қарши муросасиз муносабатни шакллантириш бўйича ўқув семинарлари ташкил этилади ва уларнинг иш фаолияти юзасидан ижтимоий тармоқлар орқали аҳоли орасида сўровномалар ўтказилиб, натижалари таҳлил қилиб борилади.

Коррупцияга қарши курашиш агентлиги 
Ахборот хизмати