Аксилкоррупция сиёсатига оид ислоҳотларнинг жойларда самарали татбиқ этиш борасидаги ишлар аҳволини таҳлил қилиш мақсадида Қорақалпоғистон Республикаси Коррупцияга қарши курашиш ҳудудий Кенгашининг навбатдаги йиғилиши бўлиб ўтди. 

Кун тартибидаги масала - ҳудуддаги ҳоким ўринбосарлари фаолияти ҳудудий кенгаш аъзолари томонидан батафсил ўрганилгани қайд этилди. Таъкидланганидек, ҳоким ўринбосарлари томонидан 2021 йилда Республика бўйича жами 36 та коррупция билан боғлиқ жиноят содир этилган бўлса, шундан 9 таси ёки ҳар тўрттадан биттаси Корақалпоғистон Республикаси туман ва шаҳар ҳокими ўринбосарлари ҳисобига тўғри келмоқда. Мазкур жиноятларнинг 4 таси ер ажратиш, 4 таси бюджет маблағларини ўзлаштириш ва давлат мулкини талон-торож қилиш ҳамда 1 таси кредит маблағларини ўзлаштириш билан боғлиқдир. Натижада давлат ва жамият манфаатларига 3 млрд. 793 млн. сўмлик моддий зарар етказилган. 

Йиғилишда шу каби коррупцион ҳолатлар, уларнинг сабаб ва оқибатлари, олдини олиш ва бартараф этиш чоралари иштирокчилар эътибор марказида бўлди. 

Мавзу юзасидан Республика прокурори ва Вазирлар Кенгаши раиси ўринбосарининг ахбороти тингланди. 

Улар томонидан тизимда ҳамон сақланиб қолаётган коррупциявий хавф-хатарларни аниқлаш ва бартараф этиш, тизимнинг очиқлигини таъминлаш ва бу жараёнга фуқаролик жамияти институтлари, кенг жамоатчилик вакилларини жалб қилиш масалалари юзасидан режалари маълум қилинди. 

Шунингдек, йиғилишда Ҳудудий кенгаш томонидан олиб борилган ўрганишлар натижасида коррупциянинг олдини олиш бўйича етарли чораларни кўрмаган бир қатор туман, шаҳар ҳокимларидан тушунтиришлар олинди.

Йиғилишда белгиланган вазифалар ижроси қатъий назоратга олиниши лозимлиги билдирилди.

Коррупцияга қарши курашиш агентлиги

Ахборот хизмати