Шу кунларда Европа тикланиш ва тараққиёт банкининг директори ўринбосари, катта сиёсий маслаҳатчи Жонатан Aвес бошчилигидаги делегация ишчи ташриф билан Ўзбекистонда бўлиб турибди. 

Ташрифнинг асосий мақсади Ўзбекистонда амалга оширилаётган сиёсий, ижтимоий ва иқтисодий ислоҳотлар, шунингдек, минтақавий даражадаги ўзаро ҳамкорлик масалаларини муҳокама қилишдан иборат. 

Ташриф доирасида жорий йилнинг 26 май куни Ж.Aвес ҳамда Коррупцияга қарши курашиш агентлиги раҳбарияти ўртасида учрашув бўлиб ўтди. 

Мулоқот аввалида Агентлик директори А.Бурхонов Ўзбекистонда коррупцияга қарши курашиш соҳасидаги сўнгги ислоҳотлар, шу жумладан, “Коррупцияга қарши курашиш тўғрисидаги” Қонунга киритилган ўзгаришлар ва Агентликка юклатилган ваколатлар, коррупцияга қарши курашиш сиёсатини такомиллаштириш мақсадида  қонунчиликда кутилаётган янгиликлар ҳақида маълумот берди.

Шунингдек, коррупцияга қарши курашувчи органлар фаолияти ва уларнинг фуқаролик жамияти институтлари билан ҳамкорлиги, коррупцияга қарши курашишда жамоатчилик назорати институти имкониятларидан фойдаланишнинг бугунги кундаги  ҳолати  хусусида ҳам тўхталиб ўтилди. 

Меҳмонлар мамлакатимиздаги очиқлик сиёсати, бу борада олиб борилаётган ислоҳотлар жараёни, шунингдек, давлат хизматчилари мол-мулки ва даромадларини декларациялаш, давлат харидларини мониторинг қилиш масалалари билан ҳам қизиқишди. 

Мулоқотлар мобайнида делегация вакиллари Ўзбекистонда очиқ маълумотлар рўйхатини кенгайтириш, давлат харидларини амалга оширишда  ўрта ва кичик тадбиркорлик субъектлари иштирокини ошириш, мазкур йўналишдаги муаммо ва камчиликларни бартараф этиш бўйича техник ва экспертлик кўмагини кўрсатишга тайёр эканликларини билдиришди.

Якунда муҳокама қилинган масалалар юзасидан самарали ҳамкорликни йўлга қўйиш бўйича келишувга эришилди. 


Коррупцияга қарши курашиш агентлиги
Ахборот хизмати