Shu kunlarda Yevropa tiklanish va taraqqiyot bankining direktori oʻrinbosari, katta siyosiy maslahatchi Jonatan Aves boshchiligidagi delegatsiya ishchi tashrif bilan Oʻzbekistonda boʻlib turibdi. 

Tashrifning asosiy maqsadi Oʻzbekistonda amalga oshirilayotgan siyosiy, ijtimoiy va iqtisodiy islohotlar, shuningdek, mintaqaviy darajadagi oʻzaro hamkorlik masalalarini muhokama qilishdan iborat. 

Tashrif doirasida joriy yilning 26-may kuni J.Aves hamda Korrupsiyaga qarshi kurashish agentligi rahbariyati oʻrtasida uchrashuv boʻlib oʻtdi. 

Muloqot avvalida Agentlik direktori A.Burxonov Oʻzbekistonda korrupsiyaga qarshi kurashish sohasidagi soʻnggi islohotlar, shu jumladan, “Korrupsiyaga qarshi kurashish toʻgʻrisidagi” Qonunga kiritilgan oʻzgarishlar va Agentlikka yuklatilgan vakolatlar, korrupsiyaga qarshi kurashish siyosatini takomillashtirish maqsadida  qonunchilikda kutilayotgan yangiliklar haqida maʼlumot berdi.

Shuningdek, korrupsiyaga qarshi kurashuvchi organlar faoliyati va ularning fuqarolik jamiyati institutlari bilan hamkorligi, korrupsiyaga qarshi kurashishda jamoatchilik nazorati instituti imkoniyatlaridan foydalanishning bugungi kundagi  holati  xususida ham toʻxtalib oʻtildi. 

Mehmonlar mamlakatimizdagi ochiqlik siyosati, bu borada olib borilayotgan islohotlar jarayoni, shuningdek, davlat xizmatchilari mol-mulki va daromadlarini deklaratsiyalash, davlat xaridlarini monitoring qilish masalalari bilan ham qiziqishdi. 

Muloqotlar mobaynida delegatsiya vakillari Oʻzbekistonda ochiq maʼlumotlar roʻyxatini kengaytirish, davlat xaridlarini amalga oshirishda  oʻrta va kichik tadbirkorlik subyektlari ishtirokini oshirish, mazkur yoʻnalishdagi muammo va kamchiliklarni bartaraf etish boʻyicha texnik va ekspertlik koʻmagini koʻrsatishga tayyor ekanliklarini bildirishdi.

Yakunda muhokama qilingan masalalar yuzasidan samarali hamkorlikni yoʻlga qoʻyish boʻyicha kelishuvga erishildi. 

Korrupsiyaga qarshi kurashish agentligi
Axborot xizmati