Халқ билан очиқ мулоқот қилиш, аҳолининг талаб ва таклифларини ўрганиш, уларнинг дардларини тинглаш, муаммоларни имкон даражасида ҳал этиш Коррупцияга қарши курашиш агентлигининг муҳим вазифаларидан бири ҳисобланади.

Агентлик раҳбарияти ва масъуллари томонидан мунтазам ўтказиб келинаётган шахсий қабуллар, Агентликка мурожаат қилиб келаётган жисмоний ва юридик шахсларнинг ҳуқуқлари, эркинликлари, қонуний манфаатларини ҳимоя қилиш борасидаги вазифаларни рўёбга чиқаришда муҳим аҳамият касб этади.

Жумладан, бугун Агентлик директори А.Бурхановнинг навбатдаги шахсий қабули бўлиб ўтди. Фуқаролар ўз мурожаатларида асосан суд қарорларидан ҳамда турли давлат органлари, маҳаллий ҳокимликларда мурожаатларининг тўлиқ ва холисона кўриб чиқилмаётганлигидан  ҳамда коррупциявий ҳолатлардан норозиликлар билдиришди.

Қабулда фуқароларнинг мурожаатлари тўлиқ тингланиб, муаммоларнинг ечими бўйича тегишли ҳуқуқий тушунтириш ва маслаҳатлар берилди. Ижроси ўрганиш ва вақт талаб қиладиган мурожаатлар бўйича фуқаролардан тегишли тартибда ариза ва шикоятлар қабул қилиниб, ижроси қатъий назоратга олинди. 

Давлат органларининг “Халқ билан мулоқот” қилиши тамойилини ҳаётга татбиқ этиш учун ташкил этилаётган бундай қабуллар аҳоли муаммоларининг ўз вақтида ҳал этилишига хизмат қилади ҳамда мурожаатларда кўрсатиб ўтилаётган коррупциявий ҳолатларни келтириб чиқараётган омилларни таҳлил қилган ҳолда уларни бартараф этиш учун тегишли чора-тадбирларнинг ишлаб чиқилишига замин яратади. 

Коррупцияга қарши курашиш агентлиги

Ахборот хизмати