Жорий йилнинг 10 июнь куни Олий Мажлис Сенатининг Ахборот сиёсати ва давлат органларида очиқликни таъминлаш масалалари қўмитасида “Ўзбекистон Республикасининг Маъмурий жавобгарлик тўғрисидаги кодексига қўшимчалар киритиш ҳақида”ги қонун кўриб чиқилди.

Мазкур қонун Ўзбекистон Республикаси Президентининг 2021 йил 16 июндаги ПФ-6247-сон Фармони билан тасдиқланган “Йўл харитаси”да белгиланган мақсад-вазифаларга асосан Коррупцияга қарши курашиш агентлиги томонидан ишлаб чиқилган. 

Қонун давлат ҳокимияти ва бошқаруви органлари фаолиятининг очиқлиги тўғрисидаги қонун ҳужжатларини бузганлик учун маъмурий жавобгарлик белгилашни назарда тутади. 

Муҳокамалар жараёнида Маъмурий жавобгарлик тўғрисидаги кодексда давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузиш, жумладан, очиқ маълумот сифатида жойлаштирилиши керак бўлган ижтимоий аҳамиятга молик маълумотлар рўйхатига киритилган маълумотларнинг очиқланишини бузганлик учун белгиланаётган жавобгарлик масаласига эътибор қаратилди. 

Шунингдек, бундай ҳуқуқбузарлик учун назарда тутилган жазо чоралари ва уларни қўллаш тартиби атрофлича муҳокама этилди.  

Муҳокама якунлари бўйича Қўмитанинг тегишли қарори қабул қилинди.

Коррупцияга қарши курашиш агентлиги

Ахборот хизмати