Жорий йилнинг 23 июнь-13 июль кунлари  Хитой Халқ Республикасининг Савдо вазирлиги томонидан айни шу мавзуда семинар ташкил этилди.

 Унда   Коррупцияга қарши курашиш агентлиги, Бош прокуратура ҳамда Олий суд ходимлари иштирок этди. 

Семинарнинг асосий мақсади  коррупцияга қарши курашишга масъул бўлган идоралар ходимларининг иқтисодий соҳадаги коррупциянинг олдини олиш бўйича  билимларини ошириш, бу борада халқаро тажриба ва амалиётнинг  илғор ютуқлари билан яқиндан таништириш, шунингдек, мавжуд муаммо ва камчиликларни таҳлил этиб, аниқ амалий таклифлар ишлаб чиқишга қаратилган.

Шу мақсадда семинарда глобал коррупцияга қарши бошқарувнинг ўзига хос хусусиятлари, ушбу  иллатга қарши чоралар ва муаммолар атрофлича муҳокама этилди.

Коррупцияга қарши курашдаги самарали технологиялар ва замонавий механизмлар, уларни амалга татбиқ этишнинг  долзарб аҳамияти хусусида батафсил маълумот берилди. 

Иштирокчилар, шунингдек, коррупцияга қарши курашиш бўйича Хитой тажрибаси билан яқиндан таништирилди. 

Семинар машғулотлари мобайнида хусусий сектордаги коррупция жиноятларига қарши чоралар ҳам кўриб чиқилди.  

Хитойлик мутахассислар иқтисодий  порахўрлик жиноятларини тергов қилишнинг муҳим ва асосий жараёнлари, бу борада эътибор қаратилиши лозим бўлган жиҳатлар юзасидан ўз тажрибалари, шунингдек, халқаро амалиёт билан ҳам ўртоқлашдилар. 

Коррупцияга қарши курашиш агентлиги

Ахборот хизмати