Joriy yilning 23-iyun-13-iyul kunlari  Xitoy Xalq Respublikasining Savdo vazirligi tomonidan ayni shu mavzuda seminar tashkil etildi.

 Unda   Korrupsiyaga qarshi kurashish agentligi, Bosh prokuratura hamda Oliy sud xodimlari ishtirok etdi. 

Seminarning asosiy maqsadi  korrupsiyaga qarshi kurashishga masʼul boʻlgan idoralar xodimlarining iqtisodiy sohadagi korrupsiyaning oldini olish boʻyicha  bilimlarini oshirish, bu borada xalqaro tajriba va amaliyotning  ilgʻor yutuqlari bilan yaqindan tanishtirish, shuningdek, mavjud muammo va kamchiliklarni tahlil etib, aniq amaliy takliflar ishlab chiqishga qaratilgan.

Shu maqsadda seminarda global korrupsiyaga qarshi boshqaruvning oʻziga xos xususiyatlari, ushbu  illatga qarshi choralar va muammolar atroflicha muhokama etildi.

Korrupsiyaga qarshi kurashdagi samarali texnologiyalar va zamonaviy mexanizmlar, ularni amalga tatbiq etishning  dolzarb ahamiyati xususida batafsil maʼlumot berildi. 

Ishtirokchilar, shuningdek, korrupsiyaga qarshi kurashish boʻyicha Xitoy tajribasi bilan yaqindan tanishtirildi. 

Seminar mashgʻulotlari mobaynida xususiy sektordagi korrupsiya jinoyatlariga qarshi choralar ham koʻrib chiqildi.  

Xitoylik mutaxassislar iqtisodiy  poraxoʻrlik jinoyatlarini tergov qilishning muhim va asosiy jarayonlari, bu borada eʼtibor qaratilishi lozim boʻlgan jihatlar yuzasidan oʻz tajribalari, shuningdek, xalqaro amaliyot bilan ham oʻrtoqlashdilar. 

Korrupsiyaga qarshi kurashish agentligi

Axborot xizmati