Коррупцияга қарши курашиш агентлиги томонидан 2022 йил 6 ойида давлат буюртмачиларининг давлат харидлари махсус ахборот порталида ўтказилган харидлари таҳлил қилинди.

Аниқланишича, жорий йилнинг 6 ойи давомида қиймати 69 852,0 млрд. сўмлик 679 804 та давлат харидлари амалга оширилган бўлиб, ушбу давлат харидаларидан 4 732,9 млрд. сўмлик 355 358 та харидлар электрон дўкон, 1 208,7 млрд. сўмлик 34 347 та харидлар электрон аукцион, 4 606,7 млрд. сўмлик 21 645 та харидлар кооперация портали, 6 649,3 млрд. сўмлик 32 136  та харидлар энг яхши таклифни танлаш, 17 444,6 млрд. сўмлик 4 968 та харидлар тендер, 7 701,0 млрд. сўмлик 52 779 та харидлар ягона етказиб берувчи ва 27 508,8 млрд. сўмлик 178 571 та харидлар тўғридан-тўғри шаклида ўтказилган.

Агентлик томонидан ўтказилган масофавий мониторинг давомида давлат харидлари тўғрисидаги қонунчилик талаблари бузилиши билан боғлик бир катор ҳолатлар аниқланди.

Масалан, ”Muza-Max” МЧЖнинг амалга оширилган давлат харидлари юзасидан келиб тушган мурожаати ўрганиб чиқилганида, Ангрен шаҳар мактабгача таълим бўлими томонидан амалга оширилган (лот рақами 98965) 771,4 млн. сўмлик давлат харидида Ўзбекистон Республикаси “Давлат харидлари тўғрисида”ги ва “Рақобат тўғрисида”ги Қонун талаблари бузилганлиги аниқланиб, ҳолат юзасидан комиссиясининг йиғилиш баёнини бекор қилиш бўйича Ангрен шаҳар мактабгача таълим бўлимига тақдимнома киритилди ҳамда қонунбузилиш ҳолатларига ҳуқуқий баҳо бериш учун тўпланган ҳужжатлар Бош прокуратурага юборилди.

Шунингдек, Қибрай туман тиббиёт бирлашмаси буюртмачилиги асосида 470,6 млн.сўмлик иссиқ овқат етказиб бериш бўйича аутсорсинг хизмати учун ўтказилган танлов (лот рақами 67659) ҳужжатлари ўрганилганда,  харид комиссияси томонидан Ўзбекистон Республикаси “Давлат харидлари тўғрисида”ги Қонуни ва Вазирлар Маҳкамасининг 2020 йил 10 январдаги 16-сонли қарори билан тасдиқланган “Ўзбекистон Республикаси Соғлиқни сақлаш вазирлиги тузилмасидаги ташкилотларда аутсорсинг хизматлари кўрсатиш тартиби тўғрисидаги” Низом талаблари бузилганлиги, танлов ўтказишда 3 нафар комиссия аъзоларининг иштирокисиз ва хабарисиз уларнинг электрон рақамли имзосидан фойдаланган ҳолда сунъий равишда ўтказилганлиги аниқланди. 

Мазкур ҳолатлар юзасидан харид комиссиясининг қарори (йиғилиш баёни) ва шу асосида танлов ғолиби билан тузилган шартномаларни бекор қилиш масаласини кўриб чиқиш юзасидан Қибрай туман тиббиёт бирлашмасига тақдимнома киритилди ҳамда қонунбузилиш ҳолатларига ҳуқуқий баҳо бериш учун тўпланган ҳужжатлар Ўзбекистон Республикаси Бош прокуратурасига юборилди.

Бундан ташқари, Агентлик томонидан Пахтачи туман маҳалла ва нуронийларни қўллаб-қувватлаш бўлими (СТИР 207317574) буюртмачилигида “etender.uzex.uz” махсус ахборот порталига 2022 йил   30 май-3 июнь кунлари 92351, 95444, 95735 ва 95739-сонли лотлар билан жами 902 792 047 сўмлик товарлар сотиб олиш учун жойлаштирилган эълон бўйича давлат хариди ҳужжат ва маълумотлари ўрганилганда, харид комиссияси томонидан “Давлат харидлари тўғрисида”ги Қонуннинг 10, 14, 23 ва 42-моддалари ҳамда “Рақобат тўғрисида”ги Қонун талаблари бузилганлиги аниқланиб, ҳолат юзасидан комиссиясининг йиғилиш баёнини бекор қилиш бўйича Пахтачи туман маҳалла ва нуронийларни қўллаб-қувватлаш бўлимига тақдимнома киритилди.

Шунингдек, Навоий шаҳар ободонлаштириш бошқармаси томонидан 2022 йил 10 июнь куни “etender.uzex.uz” ахборот порталлари орқали 100145-сонли лот бўйича қиймати 1 017 072 685 сўмлик “А.Навоий кўчасини иқлим шароити ва шаҳарсозлик талабларидан келиб чиққан ҳолда безаш” ишларини амалга ошириш бўйича давлат хариди; 
–Тошкент шаҳар Руҳий касалликлар клиник шифохонаси томонидан 2022 йил 7 июнь куни “xarid.uzex.uz” ахборот порталлари орқали 100797-сонли лот бўйича қиймати 1 млрд. 349 млн. сўмлик беморларни иссиқ овқат билан таъминлаш ишларини амалга ошириш бўйича давлат хариди;

–Ўзбекистон Республикаси Спортни ривожлантириш вазирлиги томонидан 2022 йил 30 май куни “xarid.uzex.uz” ахборот порталлари орқали 95877 ва 95879-сонли лотлар бўйича қиймати жами 2 519 млн. сўмлик футбол формаси сотиб олиш бўйича давлат хариди;

–Аму-сурхон ирригация тизимлари ҳавза бошқармаси ҳузуридаги насос станциялари ва энергетика бошқармаси томонидан 2022 йил 15 май куни “xarid.uzex.uz” ахборот порталлари орқали 88075, 87791, 87808 ва  87789-сонли лотлар бўйича қиймати жами 1 247 млн. сўмлик электродвигатель жорий таъмирлаш ишлари бўйича ўтказилган давлат харидларида буюртмачилар томонидан Ўзбекистон Республикасининг “Давлат харидлари тўғрисида”ги Қонуннинг 10,14,23,42-моддалари ва “Рақобат тўғрисида”ги қонун талаблари қўпол равишда бузилганлиги аниқланиб, буюртмачи ташкилотга ўтказилган давлат харидини бекор қилиш юзасидан тақдимномалар киритилди ва ўрганиш жараёнида тўпланган ҳужжатлар қонуний баҳо бериш учун Бош прокуратурага юборилди.
 

Коррупцияга қарши курашиш агентлиги
Ахборот хизмати