Жорий йилнинг 2 август куни Коррупцияга қарши курашиш агентлиги ҳамда Судьялар олий кенгаши ҳамкорлигида “Судьялар корпусини шакллантиришда коррупциянинг олдини олиш масалалари” мавзусида давра суҳбати ташкил этилди. 

Йиғилишда таъкидланганидек, Ўзбекистон Республикаси Президентининг 2020 йил 7 декабрдаги “Судьяларнинг чинакам мустақиллигини таъминлаш ҳамда суд тизимида коррупциянинг олдини олиш самарадорлигини ошириш чора-тадбирлари тўғрисида”ги Фармони суд ҳокимиятидаги ислоҳотларни янги босқичга олиб чиқди. Фармонга биноан, судьялар мустақиллигини таъминлаш ва суд тизимида коррупциянинг олдини олиш бўйича давлат сиёсатининг асосий йўналишлари белгиланди. 

Шунингдек, соҳада коррупциявий ҳолатлар вужудга келиши билан боғлиқ хавф-хатарларни барвақт аниқлаш ва бартараф этиш мақсадида Судьялар олий кенгашининг Судьялар дахлсизлигини таъминлаш ва коррупциянинг олдини олиш бўйича суд инспекцияси ташкил этилди. 

Таҳлилларга кўра, Коррупцияга қарши курашиш агентлигига 2022 йил I ярим йиллигида келиб тушган мурожаатларнинг аксарияти (120 та) суд қарорларидан норозилик бўйича келиб тушган (Шундан жиноят ишлари бўйича суд қароридан норозилик 55 та, Фуқаролик ишлари бўйича суд қароридан норозилик 38 та, Иқтисодий суд қароридан норозилик 18 та, Маъмурий суд қарорларидан норозилик 9 тани ташкил этади). 

Давра суҳбатида шу каби рақамлар атрофлича муҳокама қилиниб, тизимдаги коррупцион ҳуқуқбузарликларни келтириб чиқараётган омилларни аниқлаш, профилактика қилиш, турли тадқиқотларни амалга ошириш, илк судьяликка кадрларни тайёрлашда одоб-аҳлоқ қоидалари ҳамда ҳалоллик бўйича ўқишларни ташкил этиш, жамоатчилик назоратини кучайтириш, шунингдек, мавжуд қонунчиликни такомиллаштириш каби масалаларга алоҳида эътибор қаратилди.  

Бу борада Судьялар олий кенгаши ва Агентлик ўртасида йўлга қўйиладиган ҳамкорлик йўналишлари  хусусида сўз юритилди. 

Жумладан, коррупциявий омилларни бартараф этишга қаратилган норматив-ҳуқуқий ҳужжатларни ҳамкорликда ишлаб чиқиш, мамлакатнинг Ҳуқуқ устуворлиги индекси (The Rule of law index) ва Коррупцияни қабул қилиш индекси (The Corruption perceptions index) бўйича халқаро рейтинглардаги ўрнини яхшилаш мақсадида икки томон ҳаракатларини мувофиқлаштириш, шунингдек, соҳани тартибга солишга қаратилган амалдаги норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказиш ишларини амалга ошириш юзасидан ўзаро фикр алмашилди. 

Бундан ташқари, суд тизимидаги коррупция ҳолатларини тизимли равишда таҳлил қилиб бориш, аниқланган камчилик ва муаммоларни бартараф этиш бўйича биргаликда чора-тадбирлар ишлаб чиқиш зарурлиги таъкидланди. 

Давра суҳбати доирасида шу каби муҳим мақсад ва вазифаларни самарали амалга ошириш мақсадида Коррупцияга қарши курашиш агентлиги ҳамда Судьялар олий кенгаши ўртасида ўзаро ҳамкорлик меморандуми имзоланди. 

Мазкур меморандумдан ўзаро ҳамкорликда судьяларнинг чинакам мустақиллигини таъминлаш ҳамда соҳада коррупциянинг олдин олиш ва унга қарши курашиш борасида ҳуқуқий механизмни такомиллаштиришга қаратилган норматив-ҳуқуқий ҳужжат лойиҳаларини ишлаб чиқиш, шунингдек, суд тизими ходимлари ўртасида одоб-аҳлоқ қоидаларига амал қилиш, коррупцияга тоқатсиз муносабатни ва унга қарши курашиш маданиятини шакллантириш, коррупцияга қарши кураш соҳасида фаолият юритувчи кадрлар малакасини оширишга қаратилган бир қатор муҳим мақсадлар ўрин олган.

Коррупцияга қарши курашиш агентлиги
Ахборот хизмати