Joriy yilning 2-avgust kuni Korrupsiyaga qarshi kurashish agentligi hamda Sudyalar oliy kengashi hamkorligida “Sudyalar korpusini shakllantirishda korrupsiyaning oldini olish masalalari” mavzusida davra suhbati tashkil etildi. 

Tadbirda ta’kidlanganidek, Oʻzbekiston Respublikasi Prezidentining 2020-yil 7-dekabrdagi “Sudyalarning chinakam mustaqilligini ta’minlash hamda sud tizimida korrupsiyaning oldini olish samaradorligini oshirish chora-tadbirlari toʻgʻrisida”gi Farmoni sud hokimiyatidagi islohotlarni yangi bosqichga olib chiqdi. Farmonga binoan, sudyalar mustaqilligini ta’minlash va sud tizimida korrupsiyaning oldini olish boʻyicha davlat siyosatining asosiy yoʻnalishlari belgilandi. 

Shuningdek, sohada korrupsiyaviy holatlar vujudga kelishi bilan bogʻliq xavf-xatarlarni barvaqt aniqlash va bartaraf etish maqsadida Sudyalar oliy kengashining Sudyalar daxlsizligini ta’minlash va korrupsiyaning oldini olish boʻyicha sud inspeksiyasi tashkil etildi. 

Tahlillarga koʻra, Korrupsiyaga qarshi kurashish agentligiga 2022-yil I yarim yilligida kelib tushgan murojaatlarning aksariyati (120 ta) sud qarorlaridan norozilik boʻyicha kelib tushgan (Shundan jinoyat ishlari boʻyicha sud qaroridan norozilik 55 ta, Fuqarolik ishlari boʻyicha sud qaroridan norozilik 38 ta, Iqtisodiy sud qaroridan norozilik 18 ta, Ma’muriy sud qarorlaridan norozilik 9 tani tashkil etadi). 

Davra suhbatida shu kabi raqamlar atroflicha muhokama qilinib, tizimdagi korrupsion huquqbuzarliklarni keltirib chiqarayotgan omillarni aniqlash, profilaktika qilish, turli tadqiqotlarni amalga oshirish, ilk sudyalikka kadrlarni tayyorlashda odob-ahloq qoidalari hamda halollik boʻyicha oʻqishlarni tashkil etish, jamoatchilik nazoratini kuchaytirish, shuningdek, mavjud qonunchilikni takomillashtirish kabi masalalarga alohida e’tibor qaratildi.  

Bu borada Sudyalar oliy kengashi va Agentlik oʻrtasida yoʻlga qoʻyiladigan hamkorlik yoʻnalishlari  xususida soʻz yuritildi. 

Jumladan, korrupsiyaviy omillarni bartaraf etishga qaratilgan normativ-huquqiy hujjatlarni hamkorlikda ishlab chiqish, mamlakatning Huquq ustuvorligi indeksi (The Rule of law index) va Korrupsiyani qabul qilish indeksi (The Corruption perceptions index) boʻyicha xalqaro reytinglardagi oʻrnini yaxshilash maqsadida ikki tomon harakatlarini muvofiqlashtirish, shuningdek, sohani tartibga solishga qaratilgan amaldagi normativ-huquqiy hujjatlar va ularning loyihalarini korrupsiyaga qarshi ekspertizadan oʻtkazish ishlarini amalga oshirish yuzasidan oʻzaro fikr almashildi. 

Bundan tashqari, sud tizimidagi korrupsiya holatlarini tizimli ravishda tahlil qilib borish, aniqlangan kamchilik va muammolarni bartaraf etish boʻyicha birgalikda chora-tadbirlar ishlab chiqish zarurligi ta’kidlandi. 

Davra suhbati doirasida shu kabi muhim maqsad va vazifalarni samarali amalga oshirish maqsadida Korrupsiyaga qarshi kurashish agentligi hamda Sudyalar oliy kengashi oʻrtasida oʻzaro hamkorlik memorandumi imzolandi. 

Mazkur memorandumdan oʻzaro hamkorlikda sudyalarning chinakam mustaqilligini ta’minlash hamda sohada korrupsiyaning oldin olish va unga qarshi kurashish borasida huquqiy mexanizmni takomillashtirishga qaratilgan normativ-huquqiy hujjat loyihalarini ishlab chiqish, shuningdek, sud tizimi xodimlari oʻrtasida odob-ahloq qoidalariga amal qilish, korrupsiyaga toqatsiz munosabatni va unga qarshi kurashish madaniyatini shakllantirish, korrupsiyaga qarshi kurash sohasida faoliyat yurituvchi kadrlar malakasini oshirishga qaratilgan bir qator muhim maqsadlar oʻrin olgan.

Korrupsiyaga qarshi kurashish agentligi
Axborot xizmati