Бугун Коррупцияга қарши курашиш агентлиги томонидан «Коррупцияга қарши курашиш ишларининг самарадорлиги ва коррупциявий хавф-хатарларни баҳолаш амалиёти» мавзусида икки кунлик семинар-тренинг бошланди.

Унда 86 та вазирлик ва идоралар, шу жумладан, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг коррупцияга қарши ички (комплаенс) назорат тузилмалари раҳбарлари иштирок этмоқда.  

Маълумки, 2022 йил 12 январь куни Ўзбекистон Республикаси Президентининг «Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида»ги Қарори билан давлат органлари ва ташкилотлари томонидан соҳада амалга оширилаётган ишларни ягона мезон асосида баҳолаш тизими жорий этилди.

Қарор талабларидан келиб чиқиб, баҳолашнинг биринчи босқичида эксперимент тариқасида 24 та ташкилотда коррупцияга қарши курашиш ишларининг самарадорлиги 0 баллдан 100 баллгача рейтингда баҳоланди ва кенг жамоатчиликка эълон қилинди. 

Мамлакатимиз Президентининг жорий йил 11 майдаги  «Давлат бошқаруви соҳасида коррупциявий хавф-хатарларни бартараф этиш механизмларини такомиллаштириш ва ушбу соҳада жамоатчилик иштирокини кенгайтириш чора-тадбирлари тўғрисида»ги Қарори  эса бу борадаги ишларни янада такомиллаштиришда муҳим қадам бўлди.

Қарорга мувофиқ, 2022 йил 1 сентябрдан бошлаб,  “E-Anticor.uz”электрон платформасида давлат ҳокимияти ва бошқаруви органлари, шу жумладан, уларнинг ҳудудий бўлинмалари, давлат унитар корхоналари ва муассасалари, давлат улуши 50 фоиздан юқори ташкилотларнинг фаолиятида коррупциявий хавф-хатарларни мажбурий аниқлаш ва баҳолашни назарда тутувчи «Е-Антикоррупция» лойиҳаси тўлиқ ишга туширилади.

Агентлик томонидан «Коррупцияга мойил бўлган муносабатлар электрон реестри» («паст», «ўрта» ва «юқори» ўлчовларида) шакллантирилади ва Интернет тармоғида очиқ эълон қилиб борилади. Ҳар бир аниқланган коррупциявий хавф-хатарларнинг тавсифи ва даражаси, уларни бартараф этиш бўйича чораларни ўз ичига олувчи коррупциявий хавф-хатарлар хариталарини тузиш амалиёти йўлга қўйилади.

Ушбу тренинг коррупцияга қарши ички назорат тузилмалари фаолиятида кутилаётган шу каби янгиликлар ва уларнинг моҳиятини тўлиқ тушунтириш, кўп учрайдиган саволларни очиқ муҳокама қилиш, фаолиятни тартибга солувчи меъёрий ҳужжатларни амалиётга татбиқ этишдаги муаммолар ва коррупциявий хавф-хатарларни баҳолаш билан боғлиқ масалалар юзасидан фикр алмашиш ҳамда бу борада услубий ёрдам кўрсатишни кучайтириш мақсадида ташкил этилмоқда.  

Семинар-тренингда мутахассислар томонидан рейтинг баҳолаш йўналишлари ва индикатор кўрсаткичларини таҳлил қилиш усуллари ва аниқ мезонлари, коррупцияга қарши курашиш ишларининг самарадорлигини рейтинг баҳолаш электрон платформасидан фойдаланиш масалалари бўйича зарур маълумотлар, керакли тавсиялар берилмоқда.   

Шунингдек, давлат ташкилотлари фаолиятида коррупциявий хавф-хатарларни мажбурий аниқлаш ва баҳолаш тартиби, бу борадаги илғор хорижий тажриба  ва ютуқларга бағишланган тақдимотлар ўтказилади.

Семинар-тренинг мобайнида Рейтинг баҳолашнинг дастлабки якунларига кўра, коррупцияга қарши курашиш самарадорлиги «яхши» деб топилган давлат ташкилотларининг ижобий иш кўникмалари қизғин муҳокамалар марказида бўлиб, ўзаро тажриба алмашилади.

Коррупцияга қарши курашиш агентлиги

Ахборот хизмати