Коррупцияга қарши курашиш агентлиги томонидан 2022 йил июль ойида давлат буюртмачиларининг давлат харидлари махсус ахборот портали орқали амалга оширган харидлари таҳлил қилинди.

Аниқланишича, жорий йилнинг июль ойи давомида қиймати 7 137,1 млрд. сўмлик 60 610 та давлат харидлари амалга оширилган бўлиб, ушбу давлат харидларидан 312,4 млрд. сўмлик 51 753 та харидлар электрон дўкон, 81,9 млрд. сўмлик 4 186 та харидлар электрон аукцион, 931,6 млрд. сўмлик 3 361 та харидлар энг яхши таклифни танлаш, 2 137,3 млрд. сўмлик 670 та харидлар тендер ва 5 581,9 млрд. сўмлик 33 525 та харидлар тўғридан-тўғри шаклда ўтказилган.

Агентлик томонидан ўтказилган масофавий мониторинг давомида давлат харидлари тўғрисидаги қонунчилик талаблари бузилиши билан боғлиқ бир қатор ҳолатлар аниқланди.

Масалан, Паркент туман халқ таълим бўлими буюртмачилигида 200,0 млн. сўмлик бўёқ (краска) сотиб олиш юзасидан ўтказилган (лот рақами 121251) давлат харидида Ўзбекистон Республикаси “Давлат харидлари тўғрисида”ги ва “Рақобат тўғрисида”ги қонунлар талаблари бузилган ҳолда иштирокчиларга рақобатга зид талаблар қўйилганлиги ҳамда таклифлар олдиндан эълон қилинмаган мезонлар (субъектив) баҳоланишига йўл қўйилганлиги аниқланиб, ушбу камчиликларни бартараф этиш юзасидан 2022 йил 28 июль куни тақдимнома киритилди ҳамда шу куни тўпланган ҳужжатлар ҳуқуқий баҳо бериш учун Бош прокуратурага юборилган.

Паркент туман халқ таълим бўлими томонидан Агентликнинг тақдимномаси қаноатлантирилиб, 2022 йил 5 август куни харид комиссиясининг баённомалари бекор қилиниши таъминланган.

Шунингдек, “Маърифат маркази” биносидан фойдаланиш бўйича ихтисослаштирилган дирекцияси буюртмачилигида (105655 ва 106882-сонли лотлар) ўтказилган 281,7 млн.сўмлик давлат хариди ҳужжатлари ўрганиб чиқилиб, танловда харид комиссияси томонидан Ўзбекистон Республикасининг “Давлат харидлари тўғрисида”ги ва “Рақобат тўғрисида”ги қонунлар талаблари бузилган ҳолда харид комиссиясининг бир аъзоси номидан бошқа аъзоси электрон имзо қўйганлиги ва бошқа ҳолатлар аниқланииб, харид комиссиясининг йиғилиш баёнини бекор қилиш юзасидан “Маърифат маркази” биносидан фойдаланиш бўйича ихтисослаштирилган дирекциясига тақдимнома киритилиб, қонунбузилиш ҳолатларига ҳуқуқий баҳо бериш учун тўпланган ҳужжатлар Бош прокуратурага юборилган.

“Маърифат маркази” биносидан фойдаланиш бўйича ихтисослаштирилган дирекцияси томонидан Агентликнинг тақдимномаси қаноатлантирилиб, 2022 йил 6 июль куни харид комиссиясининг баённомаси бекор қилиниши таъминланган.

Бундан ташқари, ўтказилган масофавий мониторинглар жараёнида Республика ихтисослаштирилган кардиология илмий-амалий тиббиёт маркази Самарқанд вилояти минтақавий филиали буюртмачилигида “etender.uzex.uz” махсус ахборот порталига 2022 йил 16 июль куни 123254-сонли лот билан жойлаштирилган 600,0 млн.сўмлик эълонда буюртмачи томонидан Ўзбекистон Республикасининг “Давлат харидлари тўғрисида”ги ва “Рақобат тўғрисида”ги қонунларнинг талаблари қўпол равишда бузилган ҳолда харидда иштирок этган ва ғолиб деб топилган жамиятнинг таъсисчиси М.Э ушбу давлат хариди электрон савдосида иштирок этган “GBM” номли жамиятда бир пайтнинг ўзида раҳбар эканлиги ҳамда аффилланганлик ҳолатлари мавжудлиги ҳолатига баҳо берилмаганлиги аниқланган.

Мазкур ҳолат юзасидан харид комиссиясининг баённомасини бекор қилиш юзасидан Агентлик томонидан 2022 йил 25 июлда буюртмачига тақдимнома киритилган ва харид комиссиясининг баённомаси бекор қилиниши таъминланган.

Шунингдек, аниқланган қонунбузилишлар юзасидан ўрганиш жараёнида тўпланган ҳужжатлар қонуний баҳо бериш учун 2022 йил 26 июл куни Бош прокуратурага юборилган.

Шунингдек, Уйчи туман ҳокимлиги томонидан 7,2 млн сўмга “компьютер воситалари сотиб олиш” бўйича ўтказилган давлат хариди ўрганилиб, танловда иштирок этган талабгорлар ўзаро аффилланганлик ҳолати аниқланиб, Уйчи туман ҳокимлигига 2022 йил 22 июнда тақдимнома киритилди ва ҳокимлик томонидан тақдимнома қаноатлантирилиб, ушбу давлат хариди бўйича харид комиссиясининг баённомаси бекор қилиниши таъминланган.

Коррупцияга қарши курашиш агентлиги

Ахборот хизмати