Жорий йилнинг 25 август куни Соғлиқни сақлаш вазирлиги тизимида “Коррупциясиз соҳа” лойиҳасини амалга ошириш бўйича Агентлик ҳамда вазирлик ходимларидан иборат Ишчи гуруҳ учрашуви бўлиб ўтди.

Учрашувда мазкур лойиҳа доирасида ўтган давр мобайнида олиб борилган ишлар таҳлил қилиниб, келгусидаги мақсад-вазифалар атрофлича муҳокама қилинди.

Маълумки, соғлиқни сақлаш тизимида  “Коррупциясиз соҳа” лойиҳаси мамлакатимиз Президентининг 2020 йил 12 ноябрдаги “Бирламчи тиббий-санитария ёрдами муассасалари фаолиятига мутлақо янги механизмларни жорий қилиш ва соғлиқни сақлаш тизимида олиб борилаётган ислоҳотлар самарадорлигини янада ошириш чора-тадбирлари тўғрисида”ги ПФ-6110-сон Фармони, шунингдек, Ўзбекистон Республикаси Коррупцияга қарши курашиш миллий кенгаши йиғилишининг тегишли қарори асосида ҳаётга татбиқ этиб келинмоқда. 

Учрашув аввалида ушбу  лойиҳани амалга ошириш юзасидан ишлаб чиқилган 2021 йилга мўлжалланган “Йўл харитаси” ва унда белгиланган вазифалар ижросига эътибор қаратилди.

Қайд этилганидек, Агентлик ва Соғлиқни сақлаш вазирлиги ҳамкорлигида ўтган  йил мобайнида соҳада коррупциянинг олдини олишга қаратилган 26  минг дона тарғибот материаллари тайёрланиб, 3 мингдан ортиқ тиббиёт муассасалари, оилавий поликлиника ва шифохонанинг кириш жойларида жойлаштирилди. Шунингдек, “Соғлиқни сақлаш ходимлари учун коррупцияга қарши курашишга оид эслатма” тайёрланиб, тизим ходимларига етказилди.

Соҳадаги коррупцияга оид ҳолатлар ҳақида тезкор хабар бериш учун “1203” қисқа рақамли "Ишонч телефони" - Call-марказ ташкил этилди. Давлат тиббиёт муассасаларида бюджет маблағлари ҳисобидан имтиёзли тоифага кирувчи шахсларга квота асосида ордер бериш электрон шаклда амалга ошириш механизми жорий этилди.

Бундан ташқари, 2021 йил давомида жами 10 та хизмат тури тўла электрон шаклга ўтказилиб, тиббиёт муассасаларининг пулли хизматларига тўловларни “Cliсk”, “Payme” каби замонавий тўлов турлари орқали амалга ошириш йўлга қўйилди. “Электрон соғлиқни сақлаш” тизими доирасида 16 та янги ахборот тизимлари (“coronavirus.uz”, “Бемор”, “ПЗР-тест”, “Аудио скрининг” в.б.) жорий қилинишига эришилди. Тиббиёт муассасаларининг пулли хизматларига тўловларни “Cliсk”, “Payme” каби замонавий тўлов турлари орқали амалга ошириш имконияти яратилди.

Даволаш-профилактика муассасаларининг тасдиқланган пулли хизматлари миқдори вазирликнинг расмий веб-сайтига жойлаштирилиши таъминланди.

Мулоқот соғлиқни сақлаш тизимида "Коррупциясиз соҳа» лойиҳасини амалга ошириш бўйича 2022-2023 йиллларга мўжалланган "Йўл харитаси"да белгиланган вазифалар ижроси юзасидан муҳокамалар билан давом этди.

Хусусан, тизимда  замонавий бошқарув (менежмент)ни жорий  қилиш ва тиббиёт ходимларини коррупцияга қарши билими, маданиятини ошириш, шунингдек, соғлиқни сақлаш тизимида “рақамли тиббиёт” ва замонавий ахборот-коммуникация технологияларини жорий этиш масалалари юзасидан ўзаро фикр алмашилди. Соҳада коррупцияга қарши курашиш бўйича ОАВ ва жамоатчилик назорати вакиллари билан самарали ҳамкорликни  йўлга  қўйиш каби бир қатор муҳим йўналишлар доирасида амалга ошириладиган ишлар ҳам кўриб чиқилди.

Учрашувда, шунингдек, “Коррупциясиз соҳа” лойиҳа доирасида амалга ошириши лозим бўлган вазифа ва топшириқлар ижроси, жумладан, вазирлик тизимида коррупцияга қарши ички назорат тузилмаси фаолияти етарли  даражада  йўлга  қўйилмаганлиги, коррупцияга қарши курашиш ишларининг самарадорлигини рейтинг баҳолаш натижалари танқидий таҳлил қилинди.

Тадбир якунида ушбу йўналишларда амалга оширилиши лозим бўлган муҳим чора-тадбирлар, аниқ вазифа ва мақсадлар белгилаб олинди.

Коррупцияга қарши курашиш агентлиги

Ахборот хизмати