Жорий йилнинг 30 август куни Коррупцияга қарши курашиш агентлигида Ўзбекистон Республикаси мустақиллигининг 31 йиллиги муносабати билан  “Янги Ўзбекистонда эл азиз, инсон азиз” деган бош ғояни ўзида мужассам этган байрам тадбири бўлиб ўтди.

Тадбир аввалида Агентлик директори А.Бурханов сўзга чиқиб, барчани қутлуғ айём билан самимий табриклади.

Таъкидланганидек, халқимиз тақдири, мамлакатимиз ҳаётида туб бурилиш ясаган Истиқлол шарофати билан машаққатли, аммо шарафли ва шонли кечган 31 йиллик тарих бугун “Янги Ўзбекистон” деган тушунчани реал воқеликка айлантирмоқда. 

Мана шундай муҳим тарихий тараққиётга Коррупцияга қарши курашиш агентлиги ҳам давлат сиёсатининг энг устувор йўналишларидан бири - жамиятда коррупцияга нисбатан муросасиз муносабатни шакллантириш,  барча соҳаларда коррупциянинг олдини олишга доир чора-тадбирларни амалга оширишга қаратилган саъй-ҳаракатлар орқали муносиб ҳисса қўшиб келмоқда. 

А.Бурханов ўз нутқида Янги Ўзбекистондаги бугунги ислоҳотлар ҳамда  замонавий тараққиёт мамлакатимизда коррупцияга қарши курашишнинг илғор механизмларини жорий этиш, жамиятда ушбу иллатга нисбатан тоқатсизликни кучайтириш борасида Агентлик зиммасига янгидан-янги талаб ва вазифалар қўяётгани, бу ўз навбатида, давлат ва жамият тақдирига дахлдорлик, коррупциясиз келажакка масъулликни янада кучайтиришни тақозо этаётганига алоҳида урғу берди.

Байрам тадбири давомида давлатимиз мустақиллигининг 31 йиллиги муносабати билан хизмат вазифаларини самарали ва виждонан бажарганлиги, ташаббускорлиги, шунингдек, жамоат ишларида фаол иштирок этганлиги учун Агентликнинг бир гуруҳ ходимлари фахрий ёрлиқ ҳамда ташаккурнома билан тақдирланди. 

Коррупцияга қарши курашиш агентлиги

Ахборот хизмати