Joriy yilning 30-avgust kuni Korrupsiyaga qarshi kurashish agentligida Oʻzbekiston Respublikasi mustaqilligining 31 yilligi munosabati bilan  “Yangi Oʻzbekistonda el aziz, inson aziz” degan bosh gʻoyani oʻzida mujassam etgan bayram tadbiri boʻlib oʻtdi.

Tadbir avvalida Agentlik direktori A.Burxanov soʻzga chiqib, barchani qutlugʻ ayyom bilan samimiy tabrikladi.

Taʼkidlanganidek,  xalqimiz taqdiri, mamlakatimiz hayotida tub burilish yasagan Istiqlol sharofati bilan mashaqqatli, ammo sharafli va shonli kechgan 31 yillik tarix bugun “Yangi Oʻzbekiston” degan tushunchani real voqelikka aylantirmoqda. 

Mana shunday muhim tarixiy taraqqiyotga Korrupsiyaga qarshi kurashish agentligi ham davlat siyosatining eng ustuvor yoʻnalishlaridan biri - jamiyatda korrupsiyaga nisbatan murosasiz munosabatni shakllantirish,  barcha sohalarda korrupsiyaning oldini olishga doir chora-tadbirlarni amalga oshirishga qaratilgan saʼy-harakatlar orqali munosib hissa qoʻshib kelmoqda. 

A.Burxanov oʻz nutqida Yangi Oʻzbekistondagi bugungi islohotlar hamda  zamonaviy taraqqiyot mamlakatimizda korrupsiyaga qarshi kurashishning ilgʻor mexanizmlarini joriy etish, jamiyatda ushbu illatga nisbatan toqatsizlikni kuchaytirish borasida Agentlik zimmasiga yangidan-yangi talab va vazifalar qoʻyayotgani, bu oʻz navbatida, davlat va jamiyat taqdiriga daxldorlik, korrupsiyasiz kelajakka masʼullikni yanada kuchaytirishni taqozo etayotganiga alohida urgʻu berdi.     

Bayram tadbiri davomida davlatimiz mustaqilligining 31 yilligi munosabati bilan xizmat vazifalarini samarali va vijdonan bajarganligi, tashabbuskorligi, shuningdek, jamoat ishlarida faol ishtirok etganligi uchun Agentlikning bir guruh xodimlari faxriy yorliq hamda tashakkurnoma bilan taqdirlandi. 

Korrupsiyaga qarshi kurashish agentligi

Axborot xizmati