2022 йил 5-8 сентябрь кунлари Вена шаҳрида БМТ Коррупцияга қарши конвенцияси (UNCAC) Конференциясининг сессиялараро йиғилиши бўлиб ўтди.

Унда Коррупцияга қарши курашиш агентлиги директори ўринбосари Умида Тухташева  маъруза билан иштирок этди.

Йиғилишнинг асосий мақсади БМТ Бош Ассамблеяси махсус сессиясида маъқулланган «Муаммоларни самарали ҳал этиш ҳамда коррупциянинг олдини олиш ва унга қарши курашиш бўйича чора-тадбирларни амалга ошириш, шунингдек, халқаро ҳамкорликни мустаҳкамлаш бўйича умумий мажбуриятимиз» сиёсий декларациясининг амалга оширилиш ҳолатини муҳокама қилишдан иборат бўлди.

Тадбирда юртимизда сўнгги йилларда амалга оширилган асосий ислоҳотлар, коррупцияга қарши курашишнинг илғор механизм ва воситаларини жорий этишга қаратилган қатор ташаббуслар тўғрисида халқаро ҳамжамият вакилларига маълумот берилди.

Хусусан, коррупцияга қарши курашиш бўйича давлат дастурининг амалга оширилиши, давлат ҳокимияти ва бошқаруви органларида коррупцияга қарши «комплаенс-назорат»  тузилмаларининг жорий этилиши, шунингдек, давлат идоралари фаолиятининг очиқлигини таъминлаш, норматив-ҳуқуқий ҳужжатларни коррупцияга қарши экспертизадан ўтказиш, коррупцияга қарши курашиш ишларининг самарадорлигини рейтинг баҳолаш йўналишларида олиб борилаётган чора-тадбирлар алоҳида эътироф этилди.

Коррупцияга қарши курашиш агентлиги

Ахборот хизмати