2022-yil 5-8-sentyabr kunlari Vena shahrida BMT Korrupsiyaga qarshi konvensiyasi (UNCAC) Konferensiyasining sessiyalararo yigʻilishi boʻlib oʻtdi.

Unda Korrupsiyaga qarshi kurashish agentligi direktori oʻrinbosari Umida Tuxtasheva maʼruza bilan ishtirok etdi.

Yigʻilishning asosiy maqsadi BMT Bosh Assambleyasi maxsus sessiyasida maʼqullangan “Muammolarni samarali hal etish hamda korrupsiyaning oldini olish va unga qarshi kurashish boʻyicha chora-tadbirlarni amalga oshirish, shuningdek, xalqaro hamkorlikni mustahkamlash boʻyicha umumiy majburiyatimiz” siyosiy deklaratsiyasining amalga oshirilish holatini muhokama qilishdan iborat boʻldi.

Tadbirda yurtimizda soʻnggi yillarda amalga oshirilgan asosiy islohotlar, korrupsiyaga qarshi kurashishning ilgʻor mexanizm va vositalarini joriy etishga qaratilgan qator tashabbuslar toʻgʻrisida xalqaro hamjamiyat vakillariga maʼlumot berildi.

Xususan, korrupsiyaga qarshi kurashish boʻyicha davlat dasturining amalga oshirilishi, davlat hokimiyati va boshqaruvi organlarida korrupsiyaga qarshi “komplayens-nazorat” tuzilmalarining joriy etilishi, shuningdek, davlat idoralari faoliyatining ochiqligini taʼminlash, normativ-huquqiy hujjatlarni korrupsiyaga qarshi ekspertizadan oʻtkazish, korrupsiyaga qarshi kurashish ishlarining samaradorligini reyting baholash yoʻnalishlarida olib borilayotgan chora-tadbirlar alohida eʼtirof etildi.

Korrupsiyaga qarshi kurashish agentligi

Axborot xizmati