Коррупцияга қарши курашиш агентлиги томонидан Давлат божхона қўмитаси ҳамкорлигида Фарғона, Андижон ва Наманган вилоятлари божхона бошқармаси аппарати ва ҳудудий ТИФ божхона постлари ходимлари иштирокида сайёр ўқув машғулотлар  ташкил этилди. 

Мазкур сайёр ўқув машғулотлари жорий йилнинг 27 апрель куни қабул қилинган Ўзбекистон Республикаси Президентининг «Божхона маъмурият-чилигини янада такомиллаштиришга доир қўшимча чора-тадбирлар тўғрисида»ги ПФ-122-сонли Фармони ижросини таъминлаш мақсадида мунтазам ўткзиб келинмоқда. Ушбу Фармонда божхона тизимини коррупциядан холи соҳага айлантиришга қаратилган бир қатор устувор мақсад  ва вазифалар белгиланган. 

Шундан келиб чиққан ҳолда тадбирда Агентлик масъул ходими С.Маманов томонидан коррупцияга қарши курашиш борасидаги давлат сиёсати ва унинг устувор йўналишлари, ушбу йўналишдаги халқаро тажриба ҳамда келгусидаги вазифалар юзасидан иштирокчиларга атрофлича маълумот берилди. 

Шунингдек, бошқарма шахсий таркиби ўртасидаги муҳит, коррупциявий ҳолатларни келтириб чиқарадиган омиллар ҳамда божхона ходимлари фаолиятида йўл қўйилган салбий ҳолатлар аниқ мисоллар орқали атрофлича муҳокама қилинди. 

Машғулотлар мобайнида коррупцион хавфлар тенденцияларини баҳолаб бориш ҳамда ходимлар ўртасидаги ахлоқий-руҳий муҳитни яхшилаш мақсадида ходимлар билан ижтимоий сўровномалар ҳам ўтказилди.

Тадбир якунида бошқармада коррупциянинг олдини олиш, коррупцияга қарши муросасиз курашишга қаратилган таклиф ва фикр-мулоҳазалар билдирилди.   

Коррупцияга қарши курашиш агентлиги 
Ахборот хизмати