Korrupsiyaga qarshi kurashish agentligi tomonidan Davlat bojxona qoʻmitasi hamkorligida Fargʻona, Andijon va Namangan viloyatlari bojxona boshqarmasi apparati va hududiy TIF bojxona postlari xodimlari ishtirokida sayyor oʻquv mashgʻulotlar  tashkil etildi. 

Mazkur sayyor oʻquv mashgʻulotlari joriy yilning 27-aprel kuni qabul qilingan Oʻzbekiston Respublikasi Prezidentining “Bojxona maʼmuriyat-chiligini yanada takomillashtirishga doir qoʻshimcha chora-tadbirlar toʻgʻrisida”gi PF-122-sonli Farmoni ijrosini taʼminlash maqsadida muntazam oʻtkzib kelinmoqda. Ushbu Farmonda bojxona tizimini korrupsiyadan xoli sohaga aylantirishga qaratilgan bir qator ustuvor maqsad  va vazifalar belgilangan. 

Shundan kelib chiqqan holda tadbirda Agentlik masʼul xodimi S.Mamanov tomonidan korrupsiyaga qarshi kurashish borasidagi davlat siyosati va uning ustuvor yoʻnalishlari, ushbu yoʻnalishdagi xalqaro tajriba hamda kelgusidagi vazifalar yuzasidan ishtirokchilarga atroflicha maʼlumot berildi. 

Shuningdek,  boshqarma shaxsiy tarkibi oʻrtasidagi muhit, korrupsiyaviy holatlarni keltirib chiqaradigan omillar hamda bojxona xodimlari faoliyatida yoʻl qoʻyilgan salbiy holatlar aniq misollar orqali atroflicha muhokama qilindi. 

Mashgʻulotlar mobaynida korrupsion xavflar tendensiyalarini baholab borish hamda xodimlar oʻrtasidagi axloqiy-ruhiy muhitni yaxshilash maqsadida xodimlar bilan ijtimoiy soʻrovnomalar ham oʻtkazildi.

Tadbir yakunida boshqarmada korrupsiyaning oldini olish, korrupsiyaga qarshi murosasiz kurashishga qaratilgan taklif va fikr-mulohazalar bildirildi.   

Korrupsiyaga qarshi kurashish agentligi 
Axborot xizmati