Жорий йилнинг 22 сентябрь куни Япония Адлия вазирлигининг Халқаро ҳамкорлик департаменти директори Наито Синтаро раҳбарлигидаги делегациянинг Ўзбекистонга ташрифи доирасида Агентлик директори Акмал Бурханов билан учрашуви ташкил этилди. 

Мазкур мулоқотдан кўзланган асосий мақсад япониялик ҳамкорларни Агентлик фаолияти билан яқиндан таништириш, мазкур мамлакат тажрибасига оид ўзаро фикр алмашиш ва истиқболли ҳамкорлик лойиҳаларини муҳокама қилишга қаратилган.

Маълумот учун: Жорий йилнинг сентябрь ойида ҳам Агентлик директори раҳбарлигидаги делегациянинг ушбу давлатга хизмат сафари давомида Япония Адлия вазири билан учрашув бўлиб ўтган. Унда норматив-ҳуқуқий ҳужжатлар лойиҳаларини коррупцияга қарши экспертизадан ўтказишда ҳамда Агентлик ходимларининг малакасини ошириш бўйича семинар тренинглар ташкил этиш юзасидан келишувга эришилган.   

Агентлик директори япониялик ҳамкорларга коррупцияга қарши курашиш бўйича Ўзбекистонда сўнгги йилларда амалга оширилган ислоҳотлар ҳамда Агентликнинг асосий вазифа ва функциялари ҳақида маълумот бериб ўтди. 

Шундан сўнг, томонлар келгусида Агентлик ходимлари малакасини ошириш мақсадида Японияга хизмат сафарини уюштириш ҳамда япониялик экспертлар иштирокида семинар ва тренинглар ташкил этиш, коррупцияга қарши курашиш бўйича виртуал Академия лойиҳаси юзасидан япониялик экспертларнинг фикрини олиш ҳамда бошқа йўналишларда ҳамкорлик қилиш масалаларида музокаралар ўтказишди.

Коррупцияга қарши курашиш агентлиги

Ахборот хизмати