Joriy yilning 22-sentabr kuni Yaponiya Adliya vazirligining Xalqaro hamkorlik departamenti direktori Naito Sintaro rahbarligidagi delegatsiyaning O‘zbekistonga tashrifi doirasida Agentlik direktori Akmal Burxanov bilan uchrashuvi tashkil etildi. 

Mazkur muloqotdan ko'zlangan asosiy maqsad yaponiyalik hamkorlarni Agentlik faoliyati bilan yaqindan tanishtirish, mazkur mamlakat tajribasiga oid o‘zaro fikr almashish va istiqbolli hamkorlik loyihalarini muhokama qilishga qaratilgan.

Ma’lumot uchun: Joriy yilning sentabr oyida ham Agentlik direktori rahbarligidagi delegatsiyaning ushbu davlatga xizmat safari davomida Yaponiya Adliya vaziri bilan uchrashuv bo'lib o'tgan. Unda normativ-huquqiy hujjatlar loyihalarini korrupsiyaga qarshi ekspertizadan o‘tkazishda hamda Agentlik xodimlarining malakasini oshirish bo‘yicha seminar treninglar tashkil etish yuzasidan kelishuvga erishilgan.   

Agentlik direktori yaponiyalik hamkorlarga korrupsiyaga qarshi kurashish bo‘yicha O‘zbekistonda so‘nggi yillarda amalga oshirilgan islohotlar hamda Agentlikning asosiy vazifa va funksiyalari haqida ma’lumot berib o‘tdi. 

Shundan so‘ng, tomonlar kelgusida Agentlik xodimlari malakasini oshirish maqsadida Yaponiyaga xizmat safarini uyushtirish hamda yaponiyalik ekspertlar ishtirokida seminar va treninglar tashkil etish, korrupsiyaga qarshi kurashish bo‘yicha virtual Akademiya loyihasi yuzasidan yaponiyalik ekspertlarning fikrini olish hamda boshqa yo‘nalishlarda hamkorlik qilish masalalarida muzokaralar o‘tkazishdi.

Korrupsiyaga qarshi kurashish agentligi

Axborot xizmati