Жорий йилнинг 4 ноябрь куни Коррупцияга қарши курашиш агентлиги раҳбарияти бошчилигидаги делегациянинг Латвия Республикасига ташрифи амалга оширилди.

Ўзбекистон Республикаси Коррупцияга қарши курашиш агентлиги ва Латвиянинг Коррупциянинг олдини олиш ва унга қарши курашиш бюроси («Бюро») ўртасидаги ўзаро англашув Меморандуми доирасида Агентлик директори ўринбосари бошчилигидаги Ўзбекистон делегацияси Латвияга ташриф буюрди.

Ташриф давомида икки давлат коррупцияга қарши курашиш соҳасида ваколатли органлар ўртасида 2023 йилга мўлжалланган ҳамкорлик дастурини ишлаб чиқиш ва имзолаш масалалари муҳокама қилинди. Хусусан, томонлар коррупцияга қарши сиёсатни шакллантириш ва амалга ошириш, фаолиятда ахборот технология ва электрон маҳсулотларни жорий этиш, фуқаролик жамияти институтлари билан ҳамкорлик қилиш, бизнес ҳамжамиятда ҳалолликни таъминлаш юзасидан фикр алмашдилар ҳамда Бюронинг журналистлар билан ўзаро алоқаси ва Бюро фаолиятини ёритиш хусусиятлари ҳақида тўхталиб ўтдилар.

Декларация тизимини жорий этиш ва ривожлантириш борасидаги Латвияда олиб борилган ишлар, бунда давлат хизматчилари учун қулай ва тушунарли тўлдириш механизмини яратишнинг муҳимлиги ҳақида алоҳида сўз олиб борилди. Шунингдек, Латвиянинг Коррупцияга қарши давлатлар гуруҳи (GRECO) аъзолиги ва GRECO томонидан белгиланадиган халқаро стандартларни жорий этиш масалалари муҳокама этилди.

Ташриф доирасида, шунингдек, Transparency International Latvia халқаро нодавлат ташкилоти (Delna) вакиллари билан учрашув ташкил этилиб, Коррупцияни қабул қилиш индексида Ўзбекистон позицияларини яхшилашда давлат органларининг очиқлиги ва шаффофлигининг ўрни, давлатларни баҳолаш методологияси ва ушбу жараёндаги ННТларнинг роли ҳақида сўз юритилди.

Delna вакиллари билан қонун лойиҳаларнинг ташаббусларида иштирок этиш ва бу жараёнда депутатлар билан ўзаро ҳамкорлик соҳасидаги фаолиятнинг хусусиятлари, коррупцияга қарши курашиш бўйича стратегияларни ишлаб чиқиш масалалари ва ННТларнинг ушбу жараёнда иштирок этишининг ўзига хос жиҳатлари ҳамда Ўзбекистон нодавлат ташкилотларининг салоҳиятини ошириш масалалари муҳокама қилинди.

Маълумот учун: 1998 йилда ташкил этилган «Очиқлик жамияти - Delna" жамияти Латвиянинг коррупцияга қарши курашиш соҳасидаги етакчи нодавлат ташкилоти ҳисобланиб, унинг мақсади сиёсатда, давлат ва хусусий секторда, шунингдек, шахслараро муносабатларда коррупциядан холи, очиқ, адолатли ва демократик жамият яратишдан иборат.

Бундан ташқари, ташриф доирасида Рига Олий юридик мактаби директори билан учрашув ташкил этилган бўлиб, учрашувда Ўзбекистонда ташкил этилиши режалаштирилган Виртуал академия учун материаллар тайёрлашда ҳамкорлик қилиш масалалари келишиб олинди.

Учрашувлар якуни бўйича Латвия идора ва ташкилотлари Ўзбекистон Коррупцияга қарши курашиш агентлиги томонидан тақдим этилган ўзаро манфаатли таклифларни истиқболда амалга оширишга тайёрлигини маълум қилдилар.

Коррупцияга қарши курашиш агентлиги

Ахборот хизмати