Joriy yilning 4-noyabr kuni Korrupsiyaga qarshi kurashish agentligi rahbariyati boshchiligidagi delegatsiyaning Latviya Respublikasiga tashrifi amalga oshirildi.

Oʻzbekiston Respublikasi Korrupsiyaga qarshi kurashish agentligi va Latviyaning Korrupsiyaning oldini olish va unga qarshi kurashish byurosi («Byuro») oʻrtasidagi oʻzaro anglashuv Memorandumi doirasida Agentlik direktori oʻrinbosari boshchiligidagi Oʻzbekiston delegatsiyasi Latviyaga tashrif buyurdi.

Tashrif davomida ikki davlat korrupsiyaga qarshi kurashish sohasida vakolatli organlar oʻrtasida 2023-yilga moʻljallangan hamkorlik dasturini ishlab chiqish va imzolash masalalari muhokama qilindi. Xususan, tomonlar korrupsiyaga qarshi siyosatni shakllantirish va amalga oshirish, faoliyatda axborot texnologiya va elektron mahsulotlarni joriy etish, fuqarolik jamiyati institutlari bilan hamkorlik qilish, biznes hamjamiyatda halollikni ta’minlash yuzasidan fikr almashdilar hamda Byuroning jurnalistlar bilan oʻzaro aloqasi va Byuro faoliyatini yoritish xususiyatlari haqida toʻxtalib oʻtdilar.

Deklaratsiya tizimini joriy etish va rivojlantirish borasidagi Latviyada olib borilgan ishlar, bunda davlat xizmatchilari uchun qulay va tushunarli toʻldirish mexanizmini yaratishning muhimligi haqida alohida soʻz olib borildi. Shuningdek, Latviyaning Korrupsiyaga qarshi davlatlar guruhi (GRECO ) a’zoligi va GRECO tomonidan belgilanadigan xalqaro standartlarni joriy etish masalalari muhokama etildi.

Tashrif doirasida, shuningdek, Transparency International Latvia xalqaro nodavlat tashkiloti (Delna) vakillari bilan uchrashuv tashkil etilib, Korrupsiyani qabul qilish indeksida Oʻzbekiston pozitsiyalarini yaxshilashda davlat organlarining ochiqligi va shaffofligining oʻrni, davlatlarni baholash metodologiyasi va ushbu jarayondagi NNTlarning roli haqida soʻz yuritildi.

Делна vakillari bilan qonun loyihalarning tashabbuslarida ishtirok etish va bu jarayonda deputatlar bilan oʻzaro hamkorlik sohasidagi faoliyatning xususiyatlari, korrupsiyaga qarshi kurashish boʻyicha strategiyalarni ishlab chiqish masalalari va NNTlarning ushbu jarayonda ishtirok etishining oʻziga xos jihatlari hamda Oʻzbekiston nodavlat tashkilotlarining salohiyatini oshirish masalalari muhokama qilindi.

Ma’lumot uchun: 1998-yilda tashkil etilgan «Ochiqlik jamiyati - Delna" jamiyati Latviyaning korrupsiyaga qarshi kurashish sohasidagi yetakchi nodavlat tashkiloti hisoblanib, uning maqsadi siyosatda, davlat va xususiy sektorda, shuningdek, shaxslararo munosabatlarda korrupsiyadan xoli, ochiq, adolatli va demokratik jamiyat yaratishdan iborat.

Bundan tashqari, tashrif doirasida Riga Oliy yuridik maktabi direktori bilan uchrashuv tashkil etilgan boʻlib, uchrashuvda Oʻzbekistonda tashkil etilishi rejalashtirilgan Virtual akademiya uchun materiallar tayyorlashda hamkorlik qilish masalalari kelishib olindi.

Uchrashuvlar yakuni boʻyicha Latviya idora va tashkilotlari Oʻzbekiston Korrupsiyaga qarshi kurashish agentligi tomonidan taqdim etilgan oʻzaro manfaatli takliflarni istiqbolda amalga oshirishga tayyorligini ma’lum qildilar.

Korrupsiyaga qarshi kurashish agentligi

Axborot xizmati