Бизнес ва тадбиркорлик олий мактабида Миллий кадрлар захирасига киритилган тегишли номзодлар (ҳоким ўринбосарлари, бошқарма бошлиқлари, сектор раҳбарлари) учун навбатдаги малака ошириш курслари бўлиб ўтмоқда. 

Тингловчиларга ҳуқуқий, ижтимоий, сиёсий соҳалардаги давлат сиёсатининг асосий йўналишлари хусусида амалий ва назарий кўникмалар берилмоқда.

16 ноябрь куни бўлиб ўтган маърузалар қаторида Агентлик директори ўринбосари У.Тухташева томонидан “Коррупцияга қарши курашишдаги давлат сиёсатининг асосий йўналишлари” тўғрисида маълумот берилди. 

Маъруза давомида ушбу йўналишдаги қабул қилинган ҳужжатлар, уларнинг аҳоли ижтимоий-сиёсий ҳаётга таъсири, бу борадаги халқаро стандартлар ва хорижий тажриба тўғрисида тўхталиб ўтилди. 

Шу билан бирга заҳира кадрлар ташкилот ёки ҳудуд раҳбари сифатида ўз муассасасида коррупцияни олдини олиш борасидаги амалга ошириши лозим бўлган чоралар, коррупцияга қарши ички назорат тузилмалари фаолиятини самарали йўлга қўйиш ҳақида ҳам фикр алмашилди. 

Маъруза давомида оммавий ахборот воситалари ва кенг жамоатчиликни ушбу жараёнларга жалб этиш муҳимлиги ва усуллари ҳақида ҳам фикрлар тингланди.

Коррупцияга қарши курашиш агентлиги

Ахборот хизмати