9 декабрь – Халқаро коррупцияга қарши кураш куни муносабати билан "Аксилкоррупция ҳафталиги" доирасида  «Maxam-Chirchiq» АЖ  раҳбар-ходимлари иштирокида  «Коррупциявий хавф-хатарлар ва унинг олдини олиш» мавзусида давра суҳбати ўтказилди.

Унда коррупцияга қарши курашиш агентлиги масъул ходими А.Юнусов  томонидан коррупциявий хавф-хатарларни аниқлаш, баҳолаш тартиблари, мезонлари, даврийлиги, коррупциявий хатарлар харитаси, қайси ҳолатларда баҳолаш амалга оширилиши, баҳолаш натижалари бўйича амалга ошириладиган чора-тадбирлар тўғрисида батафсил маълумот берилди. 

Қайд этилганидек, 2022 йил 11 майдаги “Давлат бошқаруви соҳасида коррупциявий хавф-хатарларни бартараф этиш механизмларини такомиллаштириш ва ушбу соҳада жамоатчилик иштирокини кенгайтириш чора-тадбирлари тўғрисида”ги ПҚ-240-сон қарор билан жорий йилнинг 1 сентябридан бошлаб, давлат ҳокимияти ва бошқаруви органлари, шу жумладан, уларнинг ҳудудий бўлинмалари, давлат унитар корхоналари ва муассасалари, давлат улуши 50 фоиздан юқори ташкилотларнинг фаолиятида коррупциявий хавф-хатарларни мажбурий баҳолаш тартиби белгиланди.

Мулоқот мобайнида коррупциявий хавф-хатарларни баҳолаш жараёнларида ягона амалиётни шакллантириш мақсадида Агентлик томонидан ишлаб чиқилган Коррупциявий хавф-хатарларни аниқлаш ва баҳолаш услубиёти иштирокчиларга таништириб ўтилди.

Ўз навбатида, мазкур жараённи  самарали жорий этишда давлат органлари зиммасидаги масъулият ва мажбуриятлар борасида ҳам  фикр алмашилди.

Коррупцияга қарши курашиш агентлиги

Ахборот хизмати