9 dekabr – Xalqaro korrupsiyaga qarshi kurash kuni munosabati bilan "Aksilkorrupsiya haftaligi" doirasida “Maxam-Chirchiq” AJ rahbar-xodimlari ishtirokida «Korrupsiyaviy xavf-xatarlar va uning oldini olish» mavzusida davra suhbati o‘tkazildi.

Unda korrupsiyaga qarshi kurashish agentligi masʼul xodimi A.Yunusov tomonidan korrupsiyaviy xavf-xatarlarni aniqlash, baholash tartiblari, mezonlari, davriyligi, korrupsiyaviy xatarlar xaritasi, qaysi holatlarda baholash amalga oshirilishi, baholash natijalari bo‘yicha amalga oshiriladigan chora-tadbirlar to‘g‘risida batafsil maʼlumot berildi.

Qayd etilganidek, 2022 yil 11 maydagi “Davlat boshqaruvi sohasida korrupsiyaviy xavf-xatarlarni bartaraf etish mexanizmlarini takomillashtirish va ushbu sohada jamoatchilik ishtirokini kengaytirish chora-tadbirlari to‘g‘risida”gi PQ-240-son qaror bilan joriy yilning 1 sentyabridan boshlab, davlat hokimiyati va boshqaruvi organlari, shu jumladan, ularning hududiy bo‘linmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy baholash tartibi belgilandi.

Muloqot mobaynida korrupsiyaviy xavf-xatarlarni baholash jarayonlarida yagona amaliyotni shakllantirish maqsadida Agentlik tomonidan ishlab chiqilgan Korrupsiyaviy xavf-xatarlarni aniqlash va baholash uslubiyoti ishtirokchilarga tanishtirib o‘tildi.

O‘z navbatida, mazkur jarayonni samarali joriy etishda davlat organlari zimmasidagi masʼuliyat va majburiyatlar borasida ham fikr almashildi.

Korrupsiyaga qarshi kurashish agentligi

Axborot xizmati