Бугун Коррупцияга қарши курашиш агентлиги ҳамда Халқ таълими вазирлиги  ҳамкорлигида 9 декабрь – Халқаро коррупцияга қарши курашиш кунига бағишланган “Аксилкоррупция ҳафталиги"  доирасида вазирликда “Очиқ эшиклар куни” ўтказилди.

Тадбирда Агентлик масъул ходими Н.Самандарова мамлакатимизда жорий қилинаётган коррупцияга қарши курашиш тизимининг замонавий механизмлари, хусусан, коррупцияга қарши курашиш ички назорат тузилмалари (комплаенс назорат) фаолиятининг бугунги кундаги аҳамияти хусусида тўхталиб ўтди.

Мулоқотлар мобайнида вазирликнинг Коррупцияга қарши курашиш комплаенс назоратини амалга ошириш шўъбаси ҳамда унинг ҳудудий бўлинмалардаги вакиллари томонидан “комплаенс-назорат” (compliance control) тизими асосида олиб борилаётган ишлар ва уларнинг натижалари юзасидан ҳам маълумот берилди. 

Таъкидланишича, вазирликнинг Ички аудит хизмати ва Коррупцияга қарши курашиш комплаенс назорат шўъбаси мутахассислари томонидан жорий йил октябрь ойида Тошкент вилояти, Бўка тумани халқ таълими бўлими тизимидаги муассаса ва ташкилотларда соҳага доир қонунчиликка риоя этилиши юзасидан ўрганиш ишлари ўтказилди. Текшириш якуни бўйича туман халқ таълими бўлими мансабдор шахслари томонидан 2 млрд. 351 млн. 580,5 минг сўмлик молиявий хато ва камчиликларга йўл қўйилганлиги аниқланди.

Ўрганишлар давомида таркибида жиноят аломатлари бўлган барча ўрганиш материаллари ҳуқуқий баҳо бериш ва қонуний чоралар кўриш мақсадида ҳуқуқ-тартибот органларига тақдим этилди.

Тадбирда вазирлик тизимида давлат бюджетидан ажратилаётган маблағларнинг самарали ишлатилишини таъминлаш, коррупцион хавф-хатарлар, молиявий хато ва камчиликларни аниқлаш, бартараф этиш ва уларнинг олдини олиш бўйича олиб борилаётган ишларни янада кучайтириш  юзасидан ҳам ўзаро фикр-мулоҳаза алмашилди.

Коррупцияга қарши курашиш агентлиги

 Ахборот хизмати