Ўзбекистон Республикаси Коррупцияга қарши курашиш агентлиги раҳбари бошчилигидаги делегация аъзолари АҚШ давлат департаментига ташриф буюриб, Коррупцияга қарши курашиш бўйича глобал координатори Ричард Нефю билан учрашдилар.

Делегация раҳбари хорижий томонни мамлакатимизда коррупцияга қарши курашиш сиёсатини шакллантириш ва амалга ошириш, ваколатли органлар фаолияти ҳамда яқин истиқболдаги ривожланиш стратегияси тўғрисида хабардор қилди.

Учрашувда АҚШнинг ваколатли органлари, хусусан, АҚШ ҳуқуқни муҳофаза қилиш ва наркотикка қарши курашиш бюроси орқали ҳамкорликни ривожлантириш, ўзаро тажриба алмашиш, шу жумладан, мақбул бўлган амалиётни Ўзбекистонга татбиқ этиш масалаларини муҳокама қилдилар.

Ўз ўрнида, Р.Нефю Ўзбекистоннинг сўнгги йиллардаги тараққиёти, хусусан, коррупцияга қарши курашиш бўйича амалга оширилган ислоҳотлардан хабардорлиги, амалдаги ҳамкорликни янада такомиллаштиришга ўзаро қизиқиш мавжудлигини таъкидлади.

Ташрифнинг биринчи куни делегация аъзоларининг АҚШ Федерал қидирув бюроси директори ёрдамчиси - халқаро ҳамкорлик масалалари бўйича ФКБ масъули Реймонд Дуда билан икки томонлама учрашуви ташкил этилиб, ҳамкорликнинг истиқболлари муҳокама қилинди.

Коррупцияга қарши курашиш агентлиги

Ахборот хизмати