O‘zbekiston Respublikasi Korrupsiyaga qarshi kurashish agentligi rahbari boshchiligidagi delegatsiya a’zolari AQSH davlat departamentiga tashrif buyurib, Korrupsiyaga qarshi kurashish bo‘yicha global koordinatori Richard Nefyu bilan uchrashdilar.

Delegatsiya rahbari xorijiy tomonni mamlakatimizda korrupsiyaga qarshi kurashish siyosatini shakllantirish va amalga oshirish, vakolatli organlar faoliyati hamda yaqin istiqboldagi rivojlanish strategiyasi to‘g‘risida xabardor qildi.

Uchrashuvda AQSHning vakolatli organlari, xususan, AQSH huquqni muhofaza qilish va narkotikka qarshi kurashish byurosi orqali hamkorlikni rivojlantirish, o‘zaro tajriba almashish, shu jumladan, maqbul bo‘lgan amaliyotni O‘zbekistonga tatbiq etish masalalarini muhokama qildilar.

O‘z o‘rnida, R.Nefyu O‘zbekistonning so‘nggi yillardagi taraqqiyoti, xususan, korrupsiyaga qarshi kurashish bo‘yicha amalga oshirilgan islohotlardan xabardorligi, amaldagi hamkorlikni yanada takomillashtirishga o‘zaro qiziqish mavjudligini ta’kidladi.

Tashrifning birinchi kuni delegatsiya a’zolarining AQSH Federal qidiruv byurosi direktori yordamchisi - xalqaro hamkorlik masalalari bo‘yicha FKB mas’uli Reymond Duda bilan ikki tomonlama uchrashuvi tashkil etilib, hamkorlikning istiqbollari muhokama qilindi.

Korrupsiyaga qarshi kurashish agentligi

Axborot xizmati