“Аксилкоррупция ҳафталиги” доирасида “Ipoteka-bank” АTIB Бош офисида шу ном остида  давра суҳбати бўлиб ўтди.

Унда Коррупцияга қарши курашиш агентлиги, Бош прокуратура, Тошкент давлат юридик университети ҳамда Ўзбекистон мусулмонлар идораси ходимлари томонидан банкнинг барча филиаллари, жамоатчилик вакиллари ва талаба-ёшларга мамлакатимизда коррупциянинг олдини олиш ва унга қарши муросасиз курашишнинг илғор халқаро стандартларга асосланган тизимини жорий этиш бўйича кўрилаётган изчил чоралар хусусида маълумотлар берилди.

Жумладан, Агентлик вакили А.Юнусов таъкидлаганидек, бугунги кунда коррупцияга қарши курашиш бўйича ҳам ҳуқуқий, ҳам ташкилий жиҳатдан тизимли чора-тадбир ишлаб чиқилиб, амалиётга жорий қилинмоқда. “Коррупциясиз соҳа”, “Коррупциясиз ҳудуд” лойиҳалари амалга оширилаётгани, шунингдек, вазирлик ва идораларда, маҳаллий ҳокимликларда “комплаенс назорат” тизими йўлга қўйилаётгани шулар жумласидандир.

Агентлик вакили ўз маърузасида коррупцияга қарши курашиш борасидаги давлат сиёсатининг асосий йўналишлари, ваколатли органлар тизими, хусусан, Коррупцияга қарши курашиш агентлигининг бугунги кундаги фаолияти натижалари ҳамда келгусидаги мақсад-вазифалар хусусида ҳам тўхталиб ўтди.

Мулоқот мобайнида коррупцияга қарши муросасизлик муҳитини шакллантиришда фуқаролик жамияти институтлари ва фуқароларнинг фаоллигини ошириш, жамиятни “ҳалоллик вакцинаси билан эмлаш” зарурияти юзасидан ўзаро фикр алмашилди.

Коррупцияга қарши курашиш агентлиги

Ахборот хизмати