“Aksilkorrupsiya haftaligi” doirasida “Ipoteka-bank” ATIB Bosh ofisida shu nom ostida  davra suhbati bo‘lib o‘tdi.

Unda Korrupsiyaga qarshi kurashish agentligi, Bosh prokuratura, Toshkent davlat yuridik universiteti hamda O‘zbekiston musulmonlar idorasi xodimlari tomonidan bankning barcha filiallari, jamoatchilik vakillari va talaba-yoshlarga mamlakatimizda korrupsiyaning oldini olish va unga qarshi murosasiz kurashishning ilg‘or xalqaro standartlarga asoslangan tizimini joriy etish bo‘yicha ko‘rilayotgan izchil choralar xususida maʼlumotlar berildi.

Jumladan, Agentlik vakili A.Yunusov taʼkidlaganidek, bugungi kunda korrupsiyaga qarshi kurashish bo‘yicha ham huquqiy, ham tashkiliy jihatdan tizimli chora-tadbir ishlab chiqilib, amaliyotga joriy qilinmoqda. “Korrupsiyasiz soha”, “Korrupsiyasiz hudud” loyihalari amalga oshirilayotgani, shuningdek, vazirlik va idoralarda, mahalliy hokimliklarda “komplayens nazorat” tizimi yo‘lga qo‘yilayotgani shular jumlasidandir.

Agentlik vakili o‘z maʼruzasida korrupsiyaga qarshi kurashish borasidagi davlat siyosatining asosiy yo‘nalishlari, vakolatli organlar tizimi, xususan, Korrupsiyaga qarshi kurashish agentligining bugungi kundagi faoliyati natijalari hamda kelgusidagi maqsad-vazifalar xususida ham to‘xtalib o‘tdi.

Muloqot mobaynida korrupsiyaga qarshi murosasizlik muhitini shakllantirishda fuqarolik jamiyati institutlari va fuqarolarning faolligini oshirish, jamiyatni “halollik vaksinasi bilan emlash” zaruriyati yuzasidan o‘zaro fikr almashildi.

Korrupsiyaga qarshi kurashish agentligi

Axborot xizmati