Молия вазирлиги ҳузуридаги бюджетдан ташқари Пенсия жамғармаси ижро этувчи аппарати раҳбарияти ва ходимлари, шунингдек, Коррупцияга қарши курашиш агентлиги масъул ходими иштирокида “Очиқ эшиклар куни” тадбири ташкил этилди.

9-декабрь – Халқаро коррупцияга қарши курашиш куни муносабати билан “Аксилкоррупция ҳафталиги” доирасида ўтказилган мазкур тадбирда коррупцияга қарши курашишда энг таъсир чора сифатида фаолиятни рақамлаштириш ва электрон давлат хизматларини кўрсатиш орқали инсон омилини камайтириш, шаффофликка эришиш каби масалаларга алоҳида эътибор қаратилди.

Бу борада, хусусан, мамлакатимиз Президентининг 2021 йил 16 июндаги «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида» Фармонида белгиланган устувор вазифалар ва уларнинг ижроси юзасидан ўзаро фикр алмашилди.  

Коррупцияга қарши курашиш агентлиги масъул ходими Бекзод Раҳмонов ҳам республикамизда коррупциянинг олдини олиш бўйича олиб борилаётган ишлар, давлат хизматчилари ҳамда аҳоли ўртасидаги муносабатларда манфаатлар тўқнашувига чек қўйиш, коррупцион ҳуқуқбузарликлар учун кескин жазо чораларини қўллаш, жазо муқаррарлиги тамойилини таъминлаш, раҳбар ва ходимларнинг коррупцияга қарши билимларини мунтазам равишда ошириб бориш борасида маъруза қилди.

Шунингдек, тадбирда Пенсия жамғармаси тизимида коррупцияга қарши курашишни янада такомиллаштиришда долзарблик касб этаётган вазифа ва мақсадлар, истиқболдаги режалар атрофлича муҳокама қилинди. 

Коррупцияга қарши курашиш агентлиги

Ахборот хизмати