Moliya vazirligi huzuridagi byudjetdan tashqari Pensiya jamg‘armasi ijro etuvchi apparati rahbariyati va xodimlari, shuningdek, Korrupsiyaga qarshi kurashish agentligi masʼul xodimi ishtirokida “Ochiq eshiklar kuni” tadbiri tashkil etildi.

9-dekabr – Xalqaro korrupsiyaga qarshi kurashish kuni munosabati bilan “Aksilkorrupsiya haftaligi” doirasida o‘tkazilgan mazkur tadbirda korrupsiyaga qarshi kurashishda eng taʼsir chora sifatida faoliyatni raqamlashtirish va elektron davlat xizmatlarini ko‘rsatish orqali inson omilini kamaytirish, shaffoflikka erishish kabi masalalarga alohida eʼtibor qaratildi.

Bu borada, xususan, mamlakatimiz Prezidentining 2021-yil 16-iyundagi “Davlat organlari va tashkilotlarining faoliyati ochiqligini taʼminlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida” Farmonida belgilangan ustuvor vazifalar va ularning ijrosi yuzasidan o‘zaro fikr almashildi.  

Korrupsiyaga qarshi kurashish agentligi masʼul xodimi Bekzod Rahmonov ham respublikamizda korrupsiyaning oldini olish bo‘yicha olib borilayotgan ishlar, davlat xizmatchilari hamda aholi o‘rtasidagi munosabatlarda manfaatlar to‘qnashuviga chek qo‘yish, korrupsion huquqbuzarliklar uchun keskin jazo choralarini qo‘llash, jazo muqarrarligi tamoyilini taʼminlash, rahbar va xodimlarning korrupsiyaga qarshi bilimlarini muntazam ravishda oshirib borish borasida maʼruza qildi.

Shuningdek, tadbirda Pensiya jamg‘armasi tizimida korrupsiyaga qarshi kurashishni yanada takomillashtirishda dolzarblik kasb etayotgan vazifa va maqsadlar, istiqboldagi rejalar atroflicha muhokama qilindi. 

Korrupsiyaga qarshi kurashish agentligi

Axborot xizmati