Коррупцияга қарши курашиш агентлиги директори АҚШга сафари доирасида БМТнинг Гиёҳванд моддалар ва жиноятчилик бўйича бошқармаси (UNODC) Коррупция ва Иқтисодий жиноятларга қарши курашиш тармоғи раҳбари Тим Стилл ҳамда АҚШ Давлат департаментининг ҳуқуқни муҳофаза қилувчи идоралар ва наркотиклар бўйича минтақавий бюроси (INL) директори Джек Андерсон билан учрашди.

Уч томонлама учрашувда Агентлик томонидан INL ва UNODC ҳамкорлигида UNCAC Implementation Platform лойиҳасини ишлаб чиқиш ҳамда уни минтақавий тажриба алмашиш майдонига айлантириш таклифи илгари сурилди.

Шунингдек, мазкур соҳада фаолият юритувчи нодавлат ташкилотларнинг реестрини юритиш, уларнинг салоҳиятини ошириш бўйича лойиҳаларни ишга туширишга келишиб олинди. Очиқ маълумотлар асосида давлат харидлари бўйича ягона маълумотлар базасини шакллантириш, давлат идоралари ходимлари учун хорижий давлатларда стажировкаларни ташкил этиш амалиётини йўлга қўйиш масалалари муҳокама қилинди.

Маълумот учун: Агентлик айни пайтда коррупцияга қарши курашиш бўйича минтақавий Хаб ҳамда Коррупцияга қарши курашиш виртуал академияси лойиҳаларини ҳам ишлаб чиқмоқда.

Коррупцияга қарши курашиш агентлиги

Ахборот хизмати