Korrupsiyaga qarshi kurashish agentligi direktori AQSHga safari doirasida BMTning Giyohvand moddalar va jinoyatchilik bo‘yicha boshqarmasi (UNODC) Korrupsiya va Iqtisodiy jinoyatlarga qarshi kurashish tarmog‘i rahbari Tim Still hamda AQSH Davlat departamentining huquqni muhofaza qiluvchi idoralar va narkotiklar bo‘yicha mintaqaviy byurosi (INL) direktori Djek Anderson bilan uchrashdi.

Uch tomonlama uchrashuvda Agentlik tomonidan INL va UNODC hamkorligida UNCAC Implementation Platform loyihasini ishlab chiqish hamda uni mintaqaviy tajriba almashish maydoniga aylantirish taklifi ilgari surildi.

Shuningdek, mazkur sohada faoliyat yurituvchi nodavlat tashkilotlarning reyestrini yuritish, ularning salohiyatini oshirish bo‘yicha loyihalarni ishga tushirishga kelishib olindi. Ochiq maʼlumotlar asosida davlat xaridlari bo‘yicha yagona maʼlumotlar bazasini shakllantirish, davlat idoralari xodimlari uchun xorijiy davlatlarda stajirovkalarni tashkil etish amaliyotini yo‘lga qo‘yish masalalari muhokama qilindi.

Maʼlumot uchun: Agentlik ayni paytda korrupsiyaga qarshi kurashish bo‘yicha mintaqaviy Xab hamda Korrupsiyaga qarshi kurashish virtual akademiyasi loyihalarini ham ishlab chiqmoqda.

Korrupsiyaga qarshi kurashish agentligi

Axborot xizmati