Агентлик масъул ходимлари томонидан аҳоли кайфиятига бевосита таъсир кўрсатувчи энг долзарб муаммоларни ўрганиш бўйича Республика Ишчи гуруҳи таркибида жорий йилнинг 1-5 ноябрь кунлари Андижон вилоятида ўрганишлар ўтказилди.

Хусусан, вилоятда ижтимоий тармоқларда эълон қилинган ҳамда аҳолининг кескин муҳокамаларига сабаб бўлган автомобилларга сиқилган газ қуйиш шохобчалари (АСГҚШ) қурилишларининг шаҳарсозлик норма ва қоидаларига зид равишда амалга оширилаётганлиги, шунингдек, мазкур йўналишда фаолият кўрсатувчи баъзи тадбиркорлар томонидан газни асоссиз паст нархларда сотилаётганлиги билан боғлиқ эълон қилинган маълумотлар таҳлилига асосан ушбу йўналишда давлат хизматлари кўрсатилишидаги мавжуд коррупциявий омиллар ўрганилди.

Маълум бўлишича, вилоятда 2022 йил давомида туман (шаҳар) қурилиш бўлимлари томонидан объектларнинг ихтисослигини ўзгартириб, АСГҚШ қуришга рухсатнома олиш бўйича келиб тушган аризаларнинг 24 тасига рухсат берилган. 

Шунингдек, «Ўзнефтгазинспекция» вилоят бўлими томонидан жорий йил мобайнида автомобилларга сиқилган газ қуйиш фаолияти билан шуғулланиш учун тадбиркорларга 24 та лицензия тақдим этилган.

Ўрганишлар давомида ушбу йўналишда фаолият кўрсатувчи шохобчалар қурилишида қурилишга рухсат бериш, шаҳарсозлик ҳужжатларини ишлаб чиқиш ва келишиш жараёнларида тадбиркорлар томонидан айрим қонунбузилиш ҳолатларига йўл қўйилганлиги маълум бўлди.

Жумладан, 4 та ҳолатда ишлаб чиқилган лойиҳа ҳужжатлари шаҳарсозлик тўғрисидаги қонунчилик ҳужжатлари талабларига мувофиқлиги юзасидан экспертизадан ўтказилмаганлиги, 5 та ҳолатда қурилиш жараёнлари бошланганлиги тўғрисида ҳудудий назорат Инспекциялари хабардор қилинмасдан, қурилиш-монтаж ишлари тугалланган объектдан фойдаланиш учун рухсатнома олинмасдан ҳамда 8 та ҳолатда қурилиш-монтаж ишлари тугалланган объектдан фойдаланиш учун рухсатнома олинмасдан аҳолига хизмат қилиб келаётганлиги аниқланди. 

Хусусан, «А.Э.М.» МЧЖ томонидан Балиқчи тумани «Ботир», «Тумор» МФЙда, Олтинкўл тумани «Иттифоқ» МФЙда, «Қ.Г.Л.» МЧЖ томонидан Андижон тумани «Жаннатмакон» МФЙда, Асака тумани «Чек» МФЙда, Қорасув шаҳарчасида, «БНҚ.Г.Л.» МЧЖ томонидан Асака тумани «Юқорибўз» МФЙда, Қўрғонтепа тумани «Нурли ёғду» МФЙда, «Р.Г.С.» МЧЖ томонидан Улуғнор тумани «Мингбулоқ» МФЙда ҳамда «Р.М.Г.» МЧЖ томонидан Жалақудуқ тумани «Ўроқчитепа» МФЙда қурилиб, фаолият кўрсатиб келаётган АСГҚШларда шу каби қонунбузилиш ҳолатлари мавжуд. 

Ўрганиш натижаларига асосан Агентлик томонидан «Ўзнефтгазинспекция»га Ишчи гуруҳ тузган ҳолда Андижон вилоятида 2022 йил давомида АСГҚШ фаолияти учун берилган лицензиялар бўйича лицензиатларнинг лицензия талаблари ва шартларига риоя этаётганлиги устидан белгиланган тартибда жойига чиққан ҳолда текшириш ўтказиш юзасидан сўровнома юборилди.

Шунингдек, ўрганиш мобайнида тўпланган ҳужжатлар масъул шахсларнинг хатти-ҳаракатларига ҳуқуқий баҳо бериш учун Ўзбекистон Республикаси Бош прокуратурасига юборилди.

Ўрганиш якунлари бўйича қабул қилинган қарор тўғрисида Агентлик томонидан қўшимча маълумот берилади.

Коррупцияга қарши курашиш агентлиги

Ахборот хизмати