Agentlik masʼul xodimlari tomonidan aholi kayfiyatiga bevosita taʼsir ko‘rsatuvchi eng dolzarb muammolarni o‘rganish bo‘yicha Respublika Ishchi guruhi tarkibida joriy yilning 1-5-noyabr kunlari Andijon viloyatida o‘rganishlar o‘tkazildi.

Xususan,  viloyatda ijtimoiy tarmoqlarda eʼlon qilingan hamda aholining keskin muhokamalariga sabab bo‘lgan avtomobillarga siqilgan gaz quyish shoxobchalari (ASGQSH) qurilishlarining shaharsozlik norma va qoidalariga zid ravishda amalga oshirilayotganligi, shuningdek, mazkur yo‘nalishda faoliyat ko‘rsatuvchi baʼzi tadbirkorlar tomonidan gazni asossiz past narxlarda sotilayotganligi bilan bog‘liq eʼlon qilingan maʼlumotlar tahliliga asosan ushbu yo‘nalishda davlat xizmatlari ko‘rsatilishidagi mavjud korrupsiyaviy omillar o‘rganildi.

Maʼlum bo‘lishicha, viloyatda 2022-yil davomida tuman (shahar) qurilish bo‘limlari tomonidan obyektlarning ixtisosligini o‘zgartirib, ASGQSH qurishga ruxsatnoma olish bo‘yicha kelib tushgan arizalarning 24 tasiga ruxsat berilgan. 

Shuningdek, “O‘zneftgazinspeksiya” viloyat bo‘limi tomonidan joriy yil mobaynida avtomobillarga siqilgan gaz quyish faoliyati bilan shug‘ullanish uchun tadbirkorlarga 24 ta litsenziya taqdim etilgan.

O‘rganishlar davomida ushbu yo‘nalishda faoliyat ko‘rsatuvchi shoxobchalar qurilishida qurilishga ruxsat berish, shaharsozlik hujjatlarini ishlab chiqish va kelishish jarayonlarida tadbirkorlar tomonidan ayrim qonunbuzilish holatlariga yo‘l qo‘yilganligi maʼlum bo‘ldi.

Jumladan, 4 ta holatda ishlab chiqilgan loyiha hujjatlari shaharsozlik to‘g‘risidagi qonunchilik hujjatlari talablariga muvofiqligi yuzasidan ekspertizadan o‘tkazilmaganligi, 5 ta holatda qurilish jarayonlari boshlanganligi to‘g‘risida hududiy nazorat Inspeksiyalari xabardor qilinmasdan, qurilish-montaj ishlari tugallangan obyektdan foydalanish uchun ruxsatnoma olinmasdan hamda 8 ta holatda qurilish-montaj ishlari tugallangan obyektdan foydalanish uchun ruxsatnoma olinmasdan aholiga xizmat qilib kelayotganligi aniqlandi.  

Xususan, “A.E.M.” MCHJ tomonidan Baliqchi tumani “Botir”, “Tumor” MFYda, Oltinko‘l tumani “Ittifoq” MFYda, “Q.G.L.” MCHJ tomonidan Andijon tumani “Jannatmakon” MFYda, Asaka tumani “Chek” MFYda, Qorasuv shaharchasida, “BNQ.G.L.” MCHJ tomonidan Asaka tumani “Yuqoribo‘z” MFYda, Qo‘rg‘ontepa tumani “Nurli yog‘du” MFYda, “R.G.S.” MCHJ tomonidan Ulug‘nor tumani “Mingbuloq” MFYda hamda “R.M.G.” MCHJ tomonidan Jalaquduq tumani “O‘roqchitepa” MFYda qurilib, faoliyat ko‘rsatib kelayotgan ASGQSHlarda shu kabi qonunbuzilish holatlari mavjud. 

O‘rganish natijalariga asosan Agentlik tomonidan “O‘zneftgazinspeksiya”ga Ishchi guruh tuzgan holda Andijon viloyatida 2022-yil davomida ASGQSH faoliyati uchun berilgan litsenziyalar bo‘yicha litsenziatlarning litsenziya talablari va shartlariga rioya etayotganligi ustidan belgilangan tartibda joyiga chiqqan holda tekshirish o‘tkazish yuzasidan so‘rovnoma yuborildi.

Shuningdek, o‘rganish mobaynida to‘plangan hujjatlar masʼul shaxslarning xatti-harakatlariga huquqiy baho berish uchun O‘zbekiston Respublikasi Bosh prokuraturasiga yuborildi.

O‘rganish yakunlari bo‘yicha qabul qilingan qaror to‘g‘risida Agentlik tomonidan qo‘shimcha maʼlumot beriladi.

Korrupsiyaga qarshi kurashish agentligi

Axborot xizmati