Айни пайтда Коррупцияга қарши курашиш агентлиги директори бошчилигидаги делегация амалий ташриф билан Тожикистон Республикасида бўлиб турибди. 

Ташрифдан кўзланган асосий мақсад Агентлик ва Тожикистон Республикаси Давлат молиявий назорати ва коррупцияга қарши курашиш агентлиги ўртасидаги ҳамкорлик Меморандуми доирасида амалга оширилган ишларни сарҳисоб қилиш, истиқболдаги қўшма лойиҳаларни муҳокама қилиб олишдан иборат. 

Делегация аъзолари Давлат молиявий назорати ва коррупцияга қарши курашиш агентлигида бўлиб, Агентликнинг асосий фаолият йўналишлари, хусусан, норматив-ҳуқуқий ҳужжатлар ва уларнинг лойиҳаларини коррупцияга қарши экспертизаси самарадорлигини таъминлаш, шунингдек, коррупциянинг олдини олиш ва унга карши курашиш соҳасидаги қонунчиликни такомиллаштириш, халқаро стандартлар ва илғор хорижий амалиётни жорий этиш жараёнлари билан яқиндан танишди.

Шундан сўнг икки мамлакатнинг коррупцияга қарши курашувчи ваколатли идоралари раҳбарлари — А.Бурхонов ҳамда  Султонзода Сулаймон Саид  ўртасида учрашув бўлиб ўтди.

Учрашувда  Меморандум  бўйича 2022 йилга мўлжалланган чора-тадбирлар режасининг амалга оширилиши атрофлича муҳокама қилинди.  

Мулоқот мобайнида мазкур меморандум ҳар икки томон мутахассисларининг билим ва малакасини ошириш, айниқса, коррупцияга оид ҳуқуқбузарликларнинг олдини олишда ижобий самара бергани, бу борада тўпланган тажриба фаолиятни такомиллаштиришга хизмат қилаётгани алоҳида эътироф этилди. 

Томонлар ўзаро самарали ҳамкорликни давом эттириш ҳамда амалга оширилаётган лойиҳалар кўламини кенгайтириш масалаларида ўзаро фикр алмашдилар.

Мулоқот якунида яқин истиқболда аниқ соҳа ва йўналишлар бўйича икки идора вакиллари биргаликда амалга оширадиган режалар, мақсад ва вазифалар белгилаб олинди.

Коррупцияга қарши курашиш агентлиги

Ахборот хизмати