Ayni paytda Korrupsiyaga qarshi kurashish agentligi direktori boshchiligidagi delegatsiya amaliy tashrif bilan Tojikiston Respublikasida bo‘lib turibdi. 

Tashrifdan ko‘zlangan asosiy maqsad Agentlik va Tojikiston Respublikasi Davlat moliyaviy nazorati va korrupsiyaga qarshi kurashish agentligi o‘rtasidagi hamkorlik Memorandumi doirasida amalga oshirilgan ishlarni sarhisob qilish, istiqboldagi qo‘shma loyihalarni muhokama qilib olishdan iborat. 

Delegatsiya aʼzolari Davlat moliyaviy nazorati va korrupsiyaga qarshi kurashish agentligida bo‘lib, Agentlikning asosiy faoliyat yo‘nalishlari, xususan, normativ-huquqiy hujjatlar va ularning loyihalarini korrupsiyaga qarshi ekspertizasi samaradorligini taʼminlash, shuningdek, korrupsiyaning oldini olish va unga karshi kurashish sohasidagi qonunchilikni takomillashtirish, xalqaro standartlar va ilg‘or xorijiy amaliyotni joriy etish jarayonlari bilan yaqindan tanishdi.

Shundan so‘ng ikki mamlakatning korrupsiyaga qarshi kurashuvchi vakolatli idoralari rahbarlari — A.Burxonov hamda Sultonzoda Sulaymon Said o‘rtasida uchrashuv bo‘lib o‘tdi.

Uchrashuvda Memorandum bo‘yicha 2022-yilga mo‘ljallangan chora-tadbirlar rejasining amalga oshirilishi atroflicha muhokama qilindi. 

Muloqot mobaynida mazkur memorandum har ikki tomon mutaxassislarining bilim va malakasini oshirish, ayniqsa, korrupsiyaga oid huquqbuzarliklarning oldini olishda ijobiy samara bergani, bu borada to‘plangan tajriba faoliyatni takomillashtirishga xizmat qilayotgani alohida eʼtirof etildi. 

Tomonlar o‘zaro samarali hamkorlikni davom ettirish hamda amalga oshirilayotgan loyihalar ko‘lamini kengaytirish masalalarida o‘zaro fikr almashdilar.

Muloqot yakunida yaqin istiqbolda aniq soha va yo‘nalishlar bo‘yicha ikki idora vakillari birgalikda amalga oshiradigan rejalar, maqsad va vazifalar belgilab olindi.

Korrupsiyaga qarshi kurashish agentligi

Axborot xizmati