Коррупцияга қарши курашиш агентлиги томонидан бюджет буюртмачилари томонидан махсус ахборот порталлари орқали амалга оширилаётган давлат харидларига оид эълонлар доимий равишда ўрганиб борилмоқда.

Аниқланишича, 2022 йилнинг ноябрь ойида жами 6 288,6 млрд. сўмлик 100 410 та давлат харидлари амалга оширилган бўлиб, шундан 410,52 млрд. сўмлик 57 887 та харидлар электрон дўкон, 64,40 млрд. сўмлик 3 447 та харидлар электрон аукцион, 1105,5 млрд. сўмлик 5 515та харидлар энг яхши таклифни танлаш, 855,2 млрд. сўмлик 189 та харидлар тендер, 1 310,7 млрд. сўмлик 6 588 та харидлар ягона етказиб берувчилар билан, 2 542,3 млрд. сўмлик 26 784 та харидлар тўғридан-тўғри шаклда амалга оширилган.

Ўрганишларда айрим давлат бюртмачилари томонидан давлат харидларини амалга оширишда қонунбузилиш ҳолатларига йўл қўйилаётганлиги маълум бўлди.

Жумладан, жорий йилнинг ноябрь ойида Агентлик томонидан буюртмачиларга аниқланган жами 9,2 млрд. сўмлик қонунбузилишларни бартараф қилиш ҳамда келгусида шу каби ҳолатларига йўл қўймаслик ҳақида 7 та тақдимнома киритилган.

Мониторинг ва ўрганишлар давлат буюртмачилари томонидан давлат харидларини амалга оширишда 10 та ҳолатда 45,0 млрд. сўмлик қонунбузилиш ҳолатларига йўл қўйилганлигини кўрсатди ва бу бўйича тўпланган ҳужжатлар ҳуқуқни муҳофаза қилувчи органларга юборилган.

Ҳозирда буюртмачиларга киритилган (7 та) тақдимномадан 4 таси бўйича харид натижалари бекор қилиниб, тегишли чора-тадбирлар белгилаб олинган.

Хусусан, Қумқўрғон туман тиббиёт бирлашмаси буюртмачилигида махсус ахборот порталига жойлаштирилган 588,3 млн. сўмлик “32-сонли оилавий поликлиника биносини мукаммал таъмирлаш” бўйича энг яхши таклифларни танлаш юзасидан эълон бўйича давлат харидига оид ҳужжат ва маълумотлар ўрганилганда мазкур давлат харидида ўзаро аффилланган шахсларга тегишли тадбиркорлик субъектлари иштирок этиб, ғолибликни қўлга киритганлиги аниқланган.

Шу каби Янгиқўрғон туман йўллардан фойдаланиш унитар корхонаси буюртмачилигида махсус ахборот порталига жойлаштирилган 130,0 млн. сўмлик “Қурилиш-монтаж ишларида транспорт хизмати кўрсатиш” юзасидан эълон бўйича давлат харидида ҳам ўзаро аффилланган шахсларга тегишли тадбиркорлик субъектлари иштирок этиб, ғолиб бўлган.

Бироқ, ҳар икки ҳолатда ҳам харид комиссияси томонидан ўзаро аффилланган шахслар харид қилиш тартиб-таомилларида иштирок этишдан четлатилмасдан Ўзбекистон Республикаси “Давлат харидлари тўғрисида”ги Қонуннинг 42-моддаси ва “Рақобат тўғрисида”ги Қонунининг 14-моддаси талаблари бузилган. Шунга кўра, буюртмачи ва юқори ташкилотларга харид натижасини бекор қилиш, келгусида бу каби қонунбузилиш ҳолатларига йўл қўймаслик юзасидан тегишли чора-тадбирларни белгилаш ҳақида тақдимномалар киритилди.

Ўзбекистон Республикаси Соғлиқни сақлаш вазирлигининг 2022 йил 24 ноябрь кунидаги ҳамда Янгиқўрғон туман йўллардан фойдаланиш унитар корхонасининг 2022 йил 23 ноябрь кунидаги жавоб хатларига кўра, буюртмачилар томонидан харид натижалари бекор қилинган.

Юқоридаги ҳолатлар юзасидан тўпланган ҳужжатлар ҳуқуқий баҳо бериш учун Бош прокуратурага юборилди.

Коррупцияга қарши курашиш агентлиги
 Ахборот хизмати