Korrupsiyaga qarshi kurashish agentligi tomonidan byudjet buyurtmachilari tomonidan maxsus axborot portallari orqali amalga oshirilayotgan davlat xaridlariga oid eʼlonlar doimiy ravishda o‘rganib borilmoqda.

Aniqlanishicha, 2022-yilning noyabr oyida jami 6 288,6 mlrd. so‘mlik 100 410 ta davlat xaridlari amalga oshirilgan bo‘lib, shundan 410,52 mlrd. so‘mlik 57 887 ta xaridlar elektron do‘kon, 64,40 mlrd. so‘mlik 3 447 ta xaridlar elektron auksion, 1105,5 mlrd. so‘mlik 5 515ta xaridlar eng yaxshi taklifni tanlash, 855,2 mlrd. so‘mlik 189 ta xaridlar tender, 1 310,7 mlrd. so‘mlik 6 588 ta xaridlar yagona yetkazib beruvchilar bilan, 2 542,3 mlrd. so‘mlik 26 784 ta xaridlar to‘g‘ridan-to‘g‘ri shaklda amalga oshirilgan.

Shu bilan birga, o‘rganishlarda ayrim davlat byurtmachilari tomonidan davlat xaridlarini amlga oshirishda qonunbuzilish holatlariga yo‘l qo‘yilayotganligi maʼlum bo‘ldi.

Jumladan, joriy yilning noyabr oyida Agentlik tomonidan buyurtmachilarga aniqlangan jami 9,2 mlrd. so‘mlik qonunbuzilishlarni bartaraf qilish hamda kelgusida shu kabi holatlariga yo‘l qo‘ymaslik haqida 7 ta taqdimnoma kiritilgan.

Monitoring va o‘rganishlar davlat buyurtmachilari tomonidan davlat xaridlarini amalga oshirishda 10 ta holatda 45,0 mlrd. so‘mlik qonunbuzilish holatlariga yo‘l qo‘yilganligini ko‘rsatdi va bu bo‘yicha to‘plangan hujjatlar huquqni muhofaza qiluvchi organlarga yuborilgan.

Hozirda buyurtmachilarga kiritilgan (7 ta) taqdimnomadan 4 tasi bo‘yicha xarid natijalari bekor qilinib, tegishli chora-tadbirlar belgilab olingan.

Xususan, Qumqo‘rg‘on tuman tibbiyot birlashmasi buyurtmachiligida maxsus axborot portaliga joylashtirilgan 588,3 mln. so‘mlik “32-sonli oilaviy poliklinika binosini mukammal taʼmirlash” bo‘yicha eng yaxshi takliflarni tanlash yuzasidan eʼlon bo‘yicha davlat xaridiga oid hujjat va maʼlumotlar o‘rganilganda mazkur davlat xaridida o‘zaro affillangan shaxslarga tegishli tadbirkorlik subyektlari ishtirok etib, g‘oliblikni qo‘lga kiritganligi aniqlangan.

Shu kabi Yangiqo‘rg‘on tuman yo‘llardan foydalanish unitar korxonasi buyurtmachiligida maxsus axborot portaliga joylashtirilgan 130,0 mln. so‘mlik “Qurilish-montaj ishlarida transport xizmati ko‘rsatish” yuzasidan eʼlon bo‘yicha davlat xaridida ham o‘zaro affillangan shaxslarga tegishli tadbirkorlik subyektlari ishtirok etib, g‘olib bo‘lgan.

Biroq, har ikki holatda ham xarid komissiyasi tomonidan o‘zaro affillangan shaxslar xarid qilish tartib-taomillarida ishtirok etishdan chetlatilmasdan O‘zbekiston Respublikasi “Davlat xaridlari to‘g‘risida”gi Qonunning 42-moddasi va “Raqobat to‘g‘risida”gi Qonunining 14-moddasi talablari buzilgan. Shunga ko‘ra, buyurtmachi va yuqori tashkilotlarga xarid natijasini bekor qilish, kelgusida bu kabi qonunbuzilish holatlariga yo‘l qo‘ymaslik yuzasidan tegishli chora-tadbirlarni belgilash haqida taqdimnomalar kiritildi.

O‘zbekiston Respublikasi Sog‘liqni saqlash vazirligining 2022-yil 24-noyabr kunidagi hamda Yangiqo‘rg‘on tuman yo‘llardan foydalanish unitar korxonasining 2022-yil 23-noyabr kunidagi javob xatlariga ko‘ra, buyurtmachilar tomonidan xarid natijalari bekor qilingan.

Yuqoridagi holatlar yuzasidan to‘plangan hujjatlar huquqiy baho berish uchun Bosh prokuraturaga yuborildi. 

Korrupsiyaga qarshi kurashish agentligi

 Axborot xizmati