Қорақалпоғистон Республикаси, вилоятлар ва Тошкент шаҳар коррупцияга қарши курашиш ҳудудий кенгашлари фаоллигини ошириш, жойларда коррупциянинг олдини олиш бўйича белгиланган вазифаларнинг ижросини таъминлаш мақсадида жорий йилнинг август-декабрь ойлари давомида семинар машғулотлари ташкил этиш белгиланган эди. Мазкур давр мобайнида 10 дан ортиқ коррупцияга қарши курашиш йўналишидаги энг муҳим масалалар юзасидан маълумотлар бериб ўтилди. 

Хусусан, жорий йилнинг 21 декабрь куни коррупцияга қарши курашиш ҳудудий кенгашлари учун белгиланган туркум семинарнинг жорий йил ҳисобидаги сўнггиси бўлиб ўтди.

Семинарда “Норматив-ҳуқуқий ҳужжатларнинг ва улар лойиҳаларининг коррупцияга қарши экспертизасини ўтказиш тартиби” тўғрисида тегишли тушунчалар берилди.

Маълумот учун: Коррупцияга қарши экспертиза - норматив-ҳуқуқий ҳужжатлар ва улар лойиҳаларида коррупциявий омилларни аниқлаш, аниқланган коррупциявий омилларни бартараф этишга қаратилган тавсиялар ишлаб чиқиш ва чоралар кўришга йўналтирилган чора-тадбирлар мажмуи.

Жумладан, коррупциявий омиллар, коррупцияга қарши экспертиза ўтказишнинг асосий тамойиллари, лойиҳаларни коррупцияга қарши экспертизасини ўтказиш тартиби, коррупцияга қарши экспертизасини ўтказувчи субъектлар тўғрисида маълумот берилди.

Савол-жавоблар жараёнларида лойиҳаларни коррупцияга қарши экспертизасини ўтказишда мустақил ва илмий экспертлар иштироки, бу борадаги хорижий тажрибалар хусусида сўз юритилди. 

Шунингдек, иштирокчилардан туркум семинарларда кўтарилган мавзулар ва уларнинг маърузачилари тўғрисида, келгуси йил семинарлар дастури, шакли, мавзулар рўйхати ҳақида фикр-мулоҳазаларини тақдим этишлари сўралди.

Коррупцияга қарши курашиш агентлиги

Ахборот хизмати