Qoraqalpog‘iston Respublikasi, viloyatlar va Toshkent shahar korrupsiyaga qarshi kurashish hududiy kengashlari faolligini oshirish, joylarda korrupsiyaning oldini olish bo‘yicha belgilangan vazifalarning ijrosini taʼminlash maqsadida joriy yilning avgust-dekabr oylari davomida seminar mashg‘ulotlari tashkil etish belgilangan edi. Mazkur davr mobaynida 10 dan ortiq korrupsiyaga qarshi kurashish yo‘nalishidagi eng muhim masalalar yuzasidan maʼlumotlar berib o‘tildi. 

Xususan, joriy yilning 21-dekabr kuni korrupsiyaga qarshi kurashish hududiy kengashlari uchun belgilangan turkum seminarning joriy yil hisobidagi so‘nggisi bo‘lib o‘tdi.

Seminarda “Normativ-huquqiy hujjatlarning va ular loyihalarining korrupsiyaga qarshi ekspertizasini o‘tkazish tartibi” to‘g‘risida tegishli tushunchalar berildi.

Maʼlumot uchun: Korrupsiyaga qarshi ekspertiza - normativ-huquqiy hujjatlar va ular loyihalarida korrupsiyaviy omillarni aniqlash, aniqlangan korrupsiyaviy omillarni bartaraf etishga qaratilgan tavsiyalar ishlab chiqish va choralar ko‘rishga yo‘naltirilgan chora-tadbirlar majmui.

Jumladan, korrupsiyaviy omillar, korrupsiyaga qarshi ekspertiza o‘tkazishning asosiy tamoyillari, loyihalarni korrupsiyaga qarshi ekspertizasini o‘tkazish tartibi, korrupsiyaga qarshi ekspertizasini o‘tkazuvchi subyektlar to‘g‘risida maʼlumot berildi.

Savol-javoblar jarayonlarida loyihalarni korrupsiyaga qarshi ekspertizasini o‘tkazishda mustaqil va ilmiy ekspertlar ishtiroki, bu boradagi xorijiy tajribalar xusussida so‘z yuritildi.

Shuningdek, ishtirokchilardan turkum seminarlarda ko‘tarilgan mavzular va ularning maʼruzachilari to‘g‘risida, kelgusi yil seminarlar dasturi, shakli, mavzular ro‘yxati haqida fikr-mulohazalarini taqdim etishlari so‘raldi.

Korrupsiyaga qarshi kurashish agentligi

Axborot xizmati