Фуқаро Х.К 2022 йил июль ойида Юқоричирчиқ тумани, Барданкул массиви ҳудудидан сотиб олган ер майдони учун кадастр ҳужжатларини расмийлаштиришда турли қийинчилик ва оворагарчиликларга дуч келаётганлиги сабабли мазкур масалани ижобий ҳал этилишида амалий ёрдам сўраб, Агентликка мурожаат қилган эди. 

Агентлик томонидан  мурожаатда келтирилган важларни тўлиқ ва холисона ўрганиб чиқиш мақсадида Давлат солиқ қўмитаси ҳузуридаги Кадастр агентлигига  сўров хати юборилди. 

Шундан сўнг мазкур масала  Давлат кадастрлари палатаси Тошкент вилояти бошқармаси Юқоричирчиқ тумани филиали мутахассислари томонидан жойига чиққан ҳолда ўрганиб чиқилди.

Ўрганиш якунида сотиб олинган ер майдони учун фуқаро Х.К.нинг номига кадастр паспорти расмийлаштирилиб берилди.

Шунингдек, фуқаро Ф.Т. Агентликка йўллаган мурожаатида “Сурхондарё ҳудудий электр тармоқлари” акциядорлик жамияти диспетчери А.А.Шеробод тумани,“Учёғоч” маҳалласидаги трансформаторга  электр таъминотидан узилиш жараёнида “автомат ўчиргич”ларини аҳолининг пули эвазига ўрнатиб бераётганлигидан норозилик билдирган. 

Мазкур масалани ўрганиб чиқиш мақсадида Агентлик томонидан 2022 йил 9 ноябрь куни Ўзбекистон Республикаси “Ҳудудий электр тармоқлари” акциядорлик жамиятига сўров хати юборилди.

Ҳолат фуқаро иштирокида “Сурхондарё ҳудудий электр тармоқлари” акциядорлик жамияти мутахассислари томонидан жойига чиққан ҳолда ўрганилди.

Ўрганиш натижасига кўра, маҳалладаги трансформаторга янги “автомат ўчиргич” ўрнатиб берилиб, мурожаат ижобий ҳал этилди.

Коррупцияга қарши курашиш агентлиги

Ахборот хизмати