Fuqaro X.K 2022-yil iyul oyida Yuqorichirchiq tumani, Bardankul massivi hududidan sotib olgan yer maydoni uchun kadastr hujjatlarini rasmiylashtirishda turli qiyinchilik va ovoragarchiliklarga duch kelayotganligi sababli mazkur masalani ijobiy hal etilishida amaliy yordam so‘rab, Agentlikka murojaat qilgan edi. 

Agentlik tomonidan murojaatda keltirilgan vajlarni to‘liq va xolisona o‘rganib chiqish maqsadida Davlat soliq qo‘mitasi huzuridagi Kadastr agentligiga so‘rov xati yuborildi. 

Shundan so‘ng mazkur masala Davlat kadastrlari palatasi Toshkent viloyati boshqarmasi Yuqorichirchiq tumani filiali mutaxassislari tomonidan joyiga chiqqan holda o‘rganib chiqildi.

O‘rganish yakunida sotib olingan yer maydoni uchun fuqaro X.K.ning nomiga kadastr pasporti rasmiylashtirilib berildi.

Shuningdek, fuqaro F.T. Agentlikka yo‘llagan murojaatida “Surxondaryo hududiy elektr tarmoqlari” aksiyadorlik jamiyati dispetcheri A.A.Sherobod tumani,“Uchyog‘och” mahallasidagi transformatorga elektr taʼminotidan uzilish jarayonida “avtomat o‘chirgich”larini aholining puli evaziga o‘rnatib berayotganligidan norozilik bildirgan. 

Mazkur masalani o‘rganib chiqish maqsadida Agentlik tomonidan 2022-yil 9-noyabr kuni O‘zbekiston Respublikasi “Hududiy elektr tarmoqlari” aksiyadorlik jamiyatiga so‘rov xati yuborildi.

Holat fuqaro ishtirokida “Surxondaryo hududiy elektr tarmoqlari” aksiyadorlik jamiyati mutaxassislari tomonidan joyiga chiqqan holda o‘rganildi.

O‘rganish natijasiga ko‘ra, mahalladagi transformatorga yangi “avtomat o‘chirgich” o‘rnatib berilib, murojaat ijobiy hal etildi.

Korrupsiyaga qarshi kurashish agentligi

Axborot xizmati