“TRACE International” халқаро ассоциацияси 2022 йилнинг "Бизнесда порахўрлик хавфи" глобал индексини эълон қилди. Унга кўра Ўзбекистон 58 балл билан 131- ўрингача кўтарилган, 2021 йилда эса 59 балл билан (1 баллдан 100 баллгача баҳоланади, 1 балл – энг ижобий) 147-ўринни эгаллаб турган эди.

Маълумот учун: TRACE Matrix индекси TRACE International ташкилоти томонидан компанияларга маълум бир мамлакатда бизнес юритишда коррупцияга дуч келиш хавфини баҳолашга имкон берадиган восита сифатида ишлаб чиқилган бўлиб, Индекс 2014 йилдан бери мунтазам равишда эълон қилиниб келинмоқда.
Бу йилги маълумотларга кўра, Шимолий Корея, Туркманистон, Экваториал Гвинея, Сурия ва Венесуэлада тижорий порахўрлик хавфи энг юқори, Норвегия, Янги Зеландия, Швеция, Швейцария ва Дания эса энг паст кўрсаткичларга эга.
Таъкидлаш жоизки, минтақамизда индексдаги ижобий ўзгаришлар фақат икки давлатда, жумладан, Ўзбекистонда кузатилмоқда.

Коррупцияга қарши курашиш агентлиги

Ахборот хизмати