Пиллачилик ва тутчилик соҳасида тадбиркорлик субъектларига субсидия бериш тизимининг шаффофлигини таъминлаш, соҳага оид қонунчилик ҳужжатларида аниқланган коррупциявий омилларга чек қўйиш мақсадида 2022 йил 23 декабрда Вазирлар Маҳкамасининг “Қонунчилик ҳужжатларида коррупциявий нормаларни аниқлаш ва бартараф этиш тизими такомиллаштирилиши муносабати билан Пиллачилик ва тутчилик ташкилотларига тутзорларда сувни тежайдиган суғориш технологияларини жорий қилиш учун сарфланган харажатларнинг бир қисмини қоплаш тартиби тўғрисидаги низомга ўзгартириш ва қўшимчалар киритиш ҳақида”ги қарори қабул қилинди.
Мазкур қарор билан амалдаги қонунчиликка коррупциявий омилларни бартараф этишга қаратилган бир қатор ўзгартиришлар киритилмоқда.
Хусусан:
- пиллачилик ва тутчилик ташкилотларига тутзорларда сувни тежайдиган суғориш технологияларини жорий қилиш учун сарфланган харажатларнинг бир қисмини қоплаш учун субсидия ажратиш махсус Туман ишчи гуруҳи томонидан кўриб чиқилиши белгиланмоқда.
Ишчи гуруҳ таркибига пиллачилик ва тутчилик ташкилотларининг устав фондидаги улушларга ёки акцияларга эгалик қиладиган ёхуд бошқарув органи ва кузатув кенгашига ўзи ёки яқин қариндошлари аъзо бўлган шахсларнинг киритилиши тақиқланмоқда.
- субсидия олиш учун талабгор бўлган тадбиркорлик субъектлари Ишчи гуруҳнинг ишчи органига аризани бевосита, почта хизмати орқали ёки электрон шаклда тақдим этиши мумкинлиги белгиланмоқда.
Мазкур ўзгартиришлар соҳада инсон омилини камайтиришга, шунингдек, қариндош-уруғчилик (непотизм) ва фаворитизм каби коррупцияни келтириб чиқарувчи омилларни бартараф этишга хизмат қилади.

Коррупцияга қарши курашиш агентлиги

Ахборот хизмати