Коррупцияга қарши курашиш агентлиги томонидан Жиззах вилоятида ўтказилган ўрганишда вилоят Кўп тармоқли тиббиёт маркази томонидан тиббиёт ускуналари харид қилишда қонунбузилишларга йўл қўйилганлиги аниқланди.

Хусусан, мазкур  Тиббиёт маркази 2021 йил 22 декабрдаги шартномага асосан “E.M.S.” МЧЖдан 245,2 млн. сўмга 2021 йилда Германия давлатида ишлаб чиқарилган “Эскулап” моделдаги жарроҳлик ускуналарини харид қилиши белгиланган. 

Товар етказиб берувчи МЧЖ томонидан 2021 йил 28 декабрдаги ҳисобварақ-фактурага кўра, ушбу моделдаги жарроҳлик ускуналари Тиббиёт марказига етказилганлиги ҳақида ҳужжат расмийлаштирилган.

Бироқ, ўрганишлар мобайнида  шартномада  қайд этилган жарроҳлик ускуналари аслида мавжуд эмаслиги, янги тиббий ускуна ўрнига эски —  1994 йилда Россия давлатида “Волжский УТЁС”да ишлаб чиқарилган жарроҳлик ускуналари олиб келинганлиги ҳамда улар яроқсиз ҳолатда эканлиги аниқланди.

Тиббиёт марказининг масъул шифокор ва ходимлари ўз раҳбариятига ушбу тиббий ускуналар СанПиН талабларига жавоб бермаслиги ва бошқа ҳолатлар тўғрисида 2022 йил 19 февралда билдиришнома билан мурожаат қилинган бўлишига қарамай, раҳбарият томонидан ҳолат бўйича ҳеч қандай чора кўрилмаган.

Мазкур ҳолатлар юзасидан тўпланган материаллар Агентлик томонидан қонуний қарор қабул қилиш учун Бош прокуратурага юборилган.

Юқорида қайд этилган ва қўшимча бошқа ҳолатлар юзасидан терговга қадар текширув ўтказилиб, натижаси бўйича прокуратура органлари томонидан Жиззах вилояти Кўп тармоқли тиббиёт маркази мансабдор шахсларига нисбатан Ўзбекистон Республикаси Жиноят кодексининг 167-моддаси 3-қисми “а” банди билан жиноят иши қўзғатилган ва ҳозирги кунда тергов ҳаракатлари олиб борилмоқда.

 

Коррупцияга қарши курашиш агентлиги

Ахборот хизмати