Korrupsiyaga qarshi kurashish agentligi tomonidan Jizzax viloyatida o‘tkazilgan o‘rganishda viloyat Ko‘p tarmoqli tibbiyot markazi tomonidan tibbiyot uskunalari xarid qilishda qonunbuzilishlarga yo‘l qo‘yilganligi aniqlandi.

Xususan, mazkur Tibbiyot markazi 2021-yil 22-dekabrdagi shartnomaga asosan “E.M.S.” MCHJdan 245,2 mln.so‘mga 2021-yilda Germaniya davlatida ishlab chiqarilgan “Eskulap” modeldagi jarrohlik uskunalarini xarid qilishi belgilangan.

Tovar yetkazib beruvchi MCHJ tomonidan 2021-yil 28-dekabrdagi hisobvaraq-fakturaga ko‘ra, ushbu modeldagi jarrohlik uskunalari Tibbiyot markaziga yetkazilganligi haqida hujjat rasmiylashtirilgan.

Biroq, o‘rganishlar mobaynida shartnomada qayd etilgan jarrohlik uskunalari aslida mavjud emasligi, yangi tibbiy uskuna o‘rniga eski — 1994-yilda Rossiya davlatida “Voljskiy UTYOS”da ishlab chiqarilgan jarrohlik uskunalari olib kelinganligi hamda ular yaroqsiz holatda ekanligi aniqlandi.

Tibbiyot markazining masʼul shifokor va xodimlari o‘z rahbariyatiga ushbu tibbiy uskunalar SanPiN talablariga javob bermasligi va boshqa holatlar to‘g‘risida 2022-yil 19-fevralda bildirishnoma bilan murojaat qilingan bo‘lishiga qaramay, rahbariyat tomonidan holat bo‘yicha hech qanday chora ko‘rilmagan.

Mazkur holatlar yuzasidan to‘plangan materiallar Agentlik tomonidan qonuniy qaror qabul qilish uchun Bosh prokuraturaga yuborilgan.

Yuqorida qayd etilgan va qo‘shimcha boshqa holatlar yuzasidan tergovga qadar tekshiruv o‘tkazilib, natijasi bo‘yicha prokuratura organlari tomonidan Jizzax viloyati Ko‘p tarmoqli tibbiyot markazi mansabdor shaxslariga nisbatan O‘zbekiston Respublikasi Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atilgan va hozirgi kunda tergov harakatlari olib borilmoqda.

Korrupsiyaga qarshi kurashish agentligi

Axborot xizmati